ASnews.kz таратқан мәліметке сәйкес, шымкенттік «Ордабасы» басшылығы тур алдында «Тобылмен» байланысқа шығып, «Қайраттан» ұпай тартып алған жағдайда қомақты қаржылай сыйақы ұсынған. Қостанайлықтар берілген тапсырманы артығымен орындады: Алматыда таблода тіркелген сенсациялық 4:1 есебі оңтүстіктіктерге чемпиондық бәсекеде қайта көш басына шығуға мүмкіндік сыйлады. Шымкенттік клуб қатар өткен ойында «Астананы» жеңіп (1:0), 58 ұпаймен турнир кестесінің шыңына көтерілді әрі жеңілген алматылықтарды бір ұпайлық айырмамен екінші орынға ығыстырды. Ал жарқын жеңіске қол жеткізген «Тобылдың» өзі ұпай қоржынын 34-ке жеткізіп, жетінші сатыға тұрақтады.
Шешуші кездесулер жақындаған сайын турнирлік интрига қыза түсуде. 27-турда «Қайратты» елордада «Астанаға» қарсы өте ауыр сынақ күтіп тұр. «Ордабасы» Түркістанда «Атыраумен» шартты түрде өз алаңындағы матчын өткізсе, бұл жеңістен қанаттанған «Тобыл» өз алаңында семейлік «Елімайды» сынайды.