«Ордабасы» өз алаңында «Жеңіспен» 1:1 есебімен тең түсті. Екінші таймның басында алаң иелерінің қорғаушысы Ги Килама допты өз қақпасына бағыттап алды. 66-минутта Жасұлан Әмір алаңнан қуылып, шымкенттіктер он ойыншымен қалды. Соған қарамастан, көп ұзамай Елхан Астанов таразы басын теңестірді. Бұл нәтиже Андрей Мартиннің шәкірттеріне өз жанкүйерлерінің алдында чемпиондықты тойлауға мүмкіндік бермеді. Алайда келесі күні Ақтөбедегі кездесудің нәтижесі «Ордабасыға» клуб тарихындағы екінші чемпиондық атақты сыйлады.
«Ақтөбе» мен «Қайрат» 2:2 есебімен тең түсті. Кездесудің басында Шейи Оджо есеп ашқанымен, Азамат Тұяқбаев айып добын дәл орындап, таразы басын теңестірді. Арада бірнеше минут өткенде Агустин Пасторица алаң иелерін қайта алға шығарды. Екінші таймда Марк Гуаль жеке шеберлігінің арқасында есепті теңестірді. Алайда алматылықтар жеңісті жұлып ала алмай, чемпиондық атаққа таласу мүмкіндігінен айырылды.
«Оқжетпес» өз алаңында «Каспийді» 3:0 есебімен ойсырата жеңді. Шахбоз Умаровтың соққысынан кейін доп Иван Кузьмичевке тиіп, қақпаға енді. Екінші таймда Владислав Васильев басымдықты арттырса, Еркебұлан Нұрғалиев пенальтиді сәтті орындады. Бұл жеңіс көкшетаулықтарға қола жүлде мен еурокубок жолдамасы үшін күресті жалғастыруға мүмкіндік берді.
«Атырау» өз алаңында «Ертіске» 2:3 есебімен жол берді. Мамаду есеп ашқанымен, үзіліске дейін Пантелич таразы басын теңестірді. Екінші таймның басында Руслан Юденков допты өз қақпасына бағыттап, алаң иелерін алға шығарды. Алайда Мұхаметжанов есепті қайта теңестірді. Кейін Юденков өз қателігін түзеп, павлодарлықтарға Премьер-лигадағы орнын сақтап қалу жолында аса маңызды жеңіс сыйлады.
«Алтай» мен «Елімай» 2:2 есебімен тең түсті. Алаң иелері Стоисавлевичтің пенальтиден және Додевтің соққан голдарының арқасында екі рет алға шықты. Алайда семейліктер екі жағдайда да таразы басын теңестірді. Алдымен Беланчич мергендік танытса, кейін Оразов он бір метрлік айып добын сәтті орындады. Қосымша уақытта Илич алаңнан қуылып, қонақтар он ойыншымен қалды.
«Қызылжар» өз алаңында «Ұлытауды» 1:0 есебімен жеңді. Бірінші таймда Баокен соққан жалғыз гол петропавлдықтарға үш ұпай әкелді. Алаң иелері басымдығын соңғы ысқырыққа дейін сақтап, Премьер-лигада қалу жолында маңызды жеңіске қол жеткізді.
«Жетісу» өз алаңында «Тобылмен» 1:1 есебімен тең түсті. Бірінші таймның ортасында Асхат Балтабеков есеп ашты. Алайда үзілістен кейін Мохамед Амин Талал таразы басын теңестірді. Талдықорғандықтар жеңісті сақтап қала алмай, соңғы тур алдында элиталық дивизиондағы орнын сақтап қалу үшін күресін жалғастырды.
«Астана» мен «Қайсар» арасындағы кездесу 0:0 есебімен аяқталды. Елорда клубы қола жүлдені мерзімінен бұрын қамтамасыз ету мүмкіндігін жіберіп алды. Ойынның соңында Марин Томасов жақын қашықтықтан соққы жасап, допты қақпа бағанасына тигізді. Қызылордалықтар маңызды бір ұпай еншілегенімен, соңғы тур алдында қиын жағдайда қалды.
Турнир кестесі: 1. «Ордабасы» — 68 ұпай, 2. «Қайрат» — 64, 3. «Астана» — 53. Толық кесте осында.
Сұрмергендер: 1. Йонсен — 14 гол, 2. Милованович — 11, 3. Томасов — 10. Толық тізім осында.
Ассистенттер: 1. Исламхан — 9 ассист, 2. Васильев — 8, 3. Пасторица — 7. Толық тізім осында.