«Серый КАРДИНАЛ» мәліметінше, Нұрлан Артықбаев ҚПЛ-дегі ең жасы үлкен команда деген атақтан арылуды көздеп отыр. Осы мақсат аясында клубтан Нани мен Бағдат Қайыровтың кетуі мүмкін екені айтылды.
Соған қарамастан, ақпаратта Нани мен Бағдат Қайыровты есептен шығарғанның өзінде «Ақтөбе» бәрібір лигадағы ең жасы үлкен ұжымдардың алдыңғы қатарында қала беретіні атап өтілген. Сондықтан дереккөз құрамды жасарту процесі бәрібір жүзеге асатынын жеткізді.
«Нұрлан Артықбаев ҚПЛ-дегі ең жасы үлкен команда деген «таңбадан» құтылғысы келеді. Қызығы, команданы тастап кететін Нани мен Бағдат Қайыровты есептен шығарғанның өзінде, «қызыл-ақтар» бәрібір ең жасы үлкен ұжымдардың алдыңғы қатарында қалып отыр. Сондықтан құрамды жасарту - сөзсіз болатын процесс», - дейді дереккөз.
ҚПЛ-дің 29 турында «Ақтөбе» 46 ұпай жинап, турнир кестесінде бесінші орынға жайғасқан.
Клубтың меншік құрылымына қатысты да өзгеріс болды: «Ақтөбе» 8 қаңтарда қазақстандық кәсіпкердің иелігіне ресми түрде өтті. Ақтөбе облысының әкімдігі клубты жекешелендіру және инвестор тарту жоспарын 2025 жылдың қарашасында жариялаған, ал мәміле сауда-саттық өткеннен кейін ғана рәсімделді. Сауда қорытындысы бойынша клуб 364 миллион теңгеге сатылған.