Пазылхайырдың сөзінше, команда алдына екі басты мақсат қойылған: ҚПЛ-де лайықты нәтиже көрсету және Қазақстан Кубогының финалына шығу. Ол бұл талаптарды бапкерге ашық айтқанын жеткізді.
«Ең алдымен Ферапонтовпен сөйлестім. Негізгі міндет - ҚПЛ-де лайықты өнер көрсету және Қазақстан Кубогының финалына шығу. Оған: “Жыл соңына дейін бар күшіңді салып, жақсы нәтиже көрсету керек”, - дедім. Біз үшін жақсы нәтиже - чемпионат кестесінің орта тұсынан орын алып, Кубок финалына шығу», - деді Пазылхайыр.
Клуб басшысы ҚПЛ-дегі жоспарды да нақтылап өтті: «Қайсар» маусымды 7-8 орындар шамасында аяқтауды көздейді. Оның айтуынша, ең жоғары меже - 7-10 орын аралығында тұрақтау, ал ең төменгі міндет - Премьер-лигадағы орнын сақтап қалу.
«ҚПЛ-де жетінші-оныншы орынға тұрақтауды мақсат етеміз. Бұл - ең жоғары меже. Ең төменгі міндет - Премьер-лигадағы орнымызды сақтап қалу. Ферапонтов өз қызметінде қалады, оның жоспарларымен таныстым. Бапкерлер штабына сенімім бар», - деп толықтырды «Қайсар» басшысы.
ҚПЛ-дегі соңғы ойындардан кейін «Қайсар» 19 ұпаймен турнир кестесінде 10-орында тұр. Қызылордалықтар келесі кездесуін 26 шілдеде сырт алаңда семейлік «Елімайға» қарсы өткізеді.