Команданың баспасөз қызметінің хабарлауынша, клубтың серіктестері «Павлодар өзен порты» АҚ (50%), «RR-CAPITAL» ЖШС (25%) және «Біріккен жеміс-көкөніс компаниясы» ЖШС (25%) болды.
Бұл ретте мемлекет балалар мен әйелдер футболының дамуына қолдау көрсетуді жалғастырады. Реформа Қазақстан президенті Қасым-Жомарт Тоқаевтың кәсіби футбол клубтарын коммерцияландыру жөніндегі тапсырмасы аясында жүзеге асырылып жатыр.
Клуб үлкен футболға қайта оралу жолының оңай болмағанын да еске салды. 2020 жылдың мамырында «Ертіс» қаржылық қиындықтарға байланысты Қазақстан чемпионатынан бас тартты, ал 2022 жылы банкрот деп танылды.
Клубты қайта қалпына келтіру жұмыстары 2023 жылы басталып, 2024 жылы павлодарлықтар кәсіби футболға оралды. Екі маусым ішінде команда Екінші лигадан Премьер-лигаға дейін көтерілді.
Клубтың ресми мәлімдемесіне сәйкес, 2026 жылы оны қолдауға 250 миллион теңге бөлінген. Жыл соңына дейін тағы 250 миллион теңге бөлу жоспарланып отыр. Алдағы уақытта жыл сайынғы инвестиция көлемі кемінде 1,5 миллиард теңгені құрауы тиіс.
Жаңа басқару үлгісінің негізгі басымдықтары ретінде жеке футбол академиясын дамыту, жас тәрбиеленушілерді даярлау және «Ертістің» Қазақстан Премьер-лигасындағы орнын нығайту аталды.