«Бұл өте ауыр ойын болды, бәрі осы матчты бақылап отырды. Жігіттер бар күшін салды. Баршаңызға рақмет. ҚПЛ-ден түсіп қалғанымыз үшін жанкүйерлерден кешірім сұраймын. Жақсы ойын болады деп ойладым. Жігіттер жеңіске деген үлкен құлшыныспен шықты. Жеңу үшін шықтық, бірақ соңында жеңіске жете алмадық. Меніңше, бұл бізге жақсы сабақ болды. Баршаңызға рақмет. Менің де қателіктерім бар, бәріңізден кешірім сұраймын», - деді Нұрдәулетов.
Ойынның өзінде «Жетісу» екі рет есепті теңестірді: 54-минутта Станислав Басманов, 78-минутта Никола Бурич гол соқты. «Астана» сапынан Әділхан Добай 58-минутта, ал Нұрбол Ануарбеков 83-минутта мергендік танытты. 71-минуттан бастап талдықорғандықтар Қашкеннің алаңнан қуылуына байланысты азшылықта ойнады.
Осы нәтижеден кейін «Жетісу» маусымды 27 ұпаймен 15-орында аяқтап, Премьер-Лигамен қоштасты. «Астана» 54 ұпай жинап, ҚПЛ-2026-ның қола жүлдесін иеленді.