Биылғы чемпионаттың басты ерекшеліктерінің бірі жүлделі орындар мен Премьер-лигадағы орынды сақтап қалу жолындағы тартысты бәсеке болды. Турнирге 16 команда қатысып, әрқайсысы 30 матч өткізді. Маусым күтпеген нәтижелермен, бапкерлердің ауысуымен және футболшылардың жарқын жеке көрсеткіштерімен есте қалды.
Шымкенттік «Ордабасы» Андрей Мартиннің жетекшілігімен 68 ұпай жинап, чемпиондықты мерзімінен бұрын қамтамасыз етті. Команда 21 жеңіске жетіп, өз қақпасына небәрі 23 гол жіберді. Бұл көрсеткіш бойынша шымкенттіктер «Қайратпен» бірге чемпионаттағы үздік нәтижені тіркеді. «Ордабасы» үшін бұл 2023 жылдан кейінгі клуб тарихындағы екінші чемпиондық атақ болды. Команданың негізгі ойыншыларының бірі жазда қатарға қосылған норвегиялық шабуылшы Бьорн Йонсен атанды. Ол 14 гол соғып, турнирдің үздік сұрмергені болды.
Алматылық «Қайрат» чемпиондық атағын қорғай алмай, 65 ұпаймен маусымды екінші орында аяқтады. Чемпионаттың соңына қарай Рафаэль Уразбахтинді Жора Арутюнян алмастырған команда лигадағы ең нәтижелі шабуылымен ерекшеленді — 60 гол. Алматылықтар маусым бойы небәрі үш рет жеңіліп, бұл көрсеткіш бойынша барлық қарсыласынан озық болды. Алайда сегіз тең ойын чемпиондықты сақтап қалуға мүмкіндік бермеді. Күміс жүлде клубқа УЕФА Конференциялар лигасының іріктеу кезеңіне қатысу құқығын берді.
Қола жүлде үшін тартыс соңғы турға дейін жалғасты. «Астана» «Жетісумен» 2:2 есебімен тең ойнаса, «Оқжетпес» «Елімайды» 4:1 есебімен жеңді. Екі команда да 54 ұпай жинады, алайда елордалық клуб соғылған және жіберілген голдар айырмашылығы бойынша үшінші орынға тұрақтады — +17 және +11. Осылайша, Григорий Бабаянның командасы Конференциялар лигасының іріктеу кезеңіне жолдама алды.
«Оқжетпес» маусымның басты жаңалықтарының біріне айналды. Ринат Әлиев жетекшілік еткен көкшетаулық ұжым 16 жеңіске жетіп, соңына дейін жүлделі орындарға таласты. Төртінші орын командаға еурокубокқа қатысу мүмкіндігін сақтап қалды. Дегенмен жолдамалардың түпкілікті бөлінуі Қазақстан кубогының финалдық нәтижесіне байланысты.
«Ақтөбе» чемпионатты 49 ұпаймен бесінші орында аяқтады. Құрамның күшейтілуіне және бапкерлер штабындағы бірнеше өзгеріске қарамастан, клуб екінші маусым қатарынан еурокубоктан тыс қалды. «Елімай» 45 ұпаймен алтыншы орынға тұрақтаса, бір жыл бұрын қола жүлдеге ие болған «Тобыл» 41 ұпай жинап, жетінші орынға төмендеді.
Турнирлік кестенің орта тұсында «Жеңіс», «Ұлытау», «Қызылжар», «Каспий» және «Ертіс» орналасты. Павлодарлықтар чемпионатты елдің жаңа чемпионы «Ордабасыны» 2:0 есебімен жеңіп аяқтады. Ал «Атырау» соңғы турда «Ұлытауды» 3:0 есебімен ұтып, Премьер-лигадағы орнын сақтап қалды.
Маусымның басты сәтсіздіктері «Жетісу» мен «Қайсардың» еншісінде қалды. Соңғы екі орынға жайғасқан талдықорғандықтар 27 ұпай жинаса, қызылордалық клуб 30 матчта небәрі төрт рет жеңіске жетіп, чемпионатты 25 ұпаймен аяқтады. Құрамдағы елеулі өзгерістер мен нигериялық танымал жартылай қорғаушы Виктор Мозестің шақырылуына қарамастан, «Қайсар» төменгі дивизионға түсіп қалудан құтыла алмады. Ал 28 ұпай жинаған «Алтай» элитадағы орнын сақтап қалды.
Келесі маусымда Премьер-лига қатарына қарағандылық «Шахтер» мен түркістандық «Тұран» қосылады. Қарағандылықтар 65 ұпаймен Бірінші лиганы жеңіп алса, «Тұран» 57 ұпай жинап, үшінші орынға ие болды. Екінші орын алған «Қайрат-Жастар» негізгі командамен бір дивизионда өнер көрсете алмайтындықтан, жоғары лигаға көтерілу құқығы Түркістан клубына берілді.
Бапкерлердің ауысуы да маусымның басты ерекшеліктерінің бірі болды. Чемпионат барысында 16 клубтың 10-ы бас бапкерін алмастырды. Тек «Ордабасы», «Астана», «Оқжетпес», «Ұлытау», «Алтай» және «Жетісу» маусымды бастаған мамандарымен бірге аяқтады.
Чемпионат қорытындысы бойынша «Ордабасы» УЕФА Чемпиондар лигасының іріктеу кезеңіне, ал «Қайрат» пен «Астана» Конференциялар лигасының іріктеу кезеңіне қатысу құқығын иеленді. Соңғы еурокубок жолдамасының тағдыры 7 қарашада Түркістанда өтетін Қазақстан кубогының финалынан кейін шешіледі. Шешуші кездесуде «Ордабасы» мен «Қайсар» күш сынасады. Шымкенттіктер жеңіске жетсе, Конференциялар лигасындағы қосымша орын «Оқжетпеске» бұйырады. Ал кубокты қызылордалықтар иеленсе, УЕФА талаптарын орындаған жағдайда еурокубокқа қатысу құқығына ие болады.
Осылайша, «Ордабасының» бір маусымда чемпионат пен ел кубогын қатар жеңіп алу мүмкіндігі бар. Ал «Қайсар» сәтсіз өткен маусымды жүлдемен аяқтауға тырысады. ҚПЛ-2027 қатысушыларының құрамы белгілі болғанымен, келесі маусымда елдің жетекші клубтары арасындағы чемпиондық бәсеке қайта жалғасады.
Турнирлік кесте: 1. «Ордабасы» — 68 ұпай, 2. «Қайрат» — 65, 3. «Астана» — 54. Толық кесте осында.
Сұрмергендер: 1. Йонсен — 14 гол, 2. Гуаль — 12, 3. Милованович — 12. Толық тізім осында.
Ассистенттер: 1. Пасторица — 9 ассист, 2. Исламхан — 9, 3. Васильев — 8. Толық тізім осында.