«Ордабасы» «Қайсарды» 4:1 есебімен ойсырата ұтып, Қазақстан Кубогын еншіледі.
«Ең алдымен финалист — қарсылас команда «Қайсар» футбол клубына алғыс айтқым келеді. Олар үшін бұл жыл өкінішке орай ауыр болды. КПЛ-дан ұшып кеткенімен, бүгін Кубок финалында өз қалаларының намысын абыроймен қорғады. Финалға дейін жеткендерінің өзі — үлкен азаматтық. Ал бізге чемпиондық дәліз ұйымдастырғандары да үлкен құрметке лайық. Сондықтан бұл ұжымға зор респект.
Келесі жылы олардың бағы жанып, Қазақстан футболының элитасына қайта оралуын тілеймін», — деді Мартин.
Бапкердің айтуынша, оның командасы ойынды басынан аяғына дейін бақылауда ұстап, жеңіске толықтай лайық болған. «Ойын туралы қысқа айтайын: бірінші минуттан соңғы минутқа дейін «Ордабасы» матчты тізгіндеп, мүмкіндіктер туғызды, агрессивті әрі сапалы, заманауи футбол көрсетті — позициялық шабуылдармен де, жылдам қарсы шабуылдармен де өрнек салды. Сондықтан стадиондағы ешбір жанкүйерде «Ордабасының» жеңісі әділ болғанына күмән қалмады деп ойлаймын», — деп атап өтті ол.
Мартин сондай-ақ Шымкент халқын құттықтап, клубқа қолдау білдіріп жүрген жандарға ерекше алғысын білдірді. «Шымкентті тағы да құттықтаймын. Әрдайым жанымыздан табылып, қолдап жүрген Шымкент әкімінен бастап, футболмен тыныстайтын барша қауымды құттықтаймын. Оның көмегі бізге ары қарай жұмыс істеуге, элита қатарында және Қазақстанның үздік командаларының арасында қалуға зор мотивация береді», — деді бас бапкер.
Сонымен қатар ол шешуші матчқа дайындық туралы да сөз қозғады, өйткені финалды екі апта күтуге тура келген. «Осылайша Кубок финалын екі апта бойы күтуімізге тура келді. Эмоциямыз сәл басылып, бұл ойынға сергек оймен келуіміз үшін кейбіреулерге демалыс бердік. Бапкерлер штабы мен барлық жігіттердің арқасында жақсы дайындалып, финалда қаламыздың намысын абыроймен қорғап, лайықты түрде жеңіске жеттік деп ойлаймын», — деп қосты Мартин.
4:1 есебіндегі жеңіс «Ордабасыны» үш дүркін Қазақстан Кубогының иегері атандырды. Бұдан бөлек, шымкенттіктер өз тарихында алғаш рет бір маусымда әрі чемпионатты, әрі ел Кубогын ұтып алып, «алтын дубль» жасады.