Q Football

Симеоне «Бавариямен» матч алдында Кейннің шеберлігіне тәнті екенін айтты

Симеоне «Бавариямен» матч алдында Кейннің шеберлігіне тәнті екенін айтты

«Атлетиконың» бас бапкері Диего Симеоне Чемпиондар лигасының төртінші турындағы кездесу алдында ағылшын шабуылшысына жоғары баға берді. Аргентиналық маман Гарри Кейнді «Алтын доп» иегері атануымен құттықтап, оның футболшы ретінде дамуын ерекше атап өтті.

«Ол – керемет футболшы, мен оның шеберлігіне әрқашан тәнті болдым. Кейн – туа біткен сұрмерген, бірақ сонымен қатар команда үшін көп еңбек етеді. Оның үлгісі балаларға қажырлы еңбек пен өз ісіне адалдық үлкен жетістіктерге жеткізетінін көрсетеді», – деп келтіреді Симеоненің сөзін Marca басылымы.

Бапкер «Баварияның» мықты қарсылас екенін де мойындап, мадридтіктерге неміс клубының қарқынды қысымына төтеп беруге тура келетінін атап өтті. Сонымен қатар ол «Метрополитано» стадионындағы жанкүйерлердің қолдауына сенім артып отыр.

Симеоне қиын кезеңді бастан өткеріп жүрген Адемола Лукманға да қолдау білдірді. Маман шабуылшының нәтижелілігі төмендеген кезеңнен өте алатынына сенімді екенін жеткізді. Оның айтуынша, бұған дейін Хулиан Альварес пен Антуан Гризманн да осындай қиындықтарды еңсерген.