Беделді британдық және испаниялық БАҚ хабарлағандай, 15 жастағы шабуылшы Джей-Джей Гэбриел клуб инфрақұрылымымен жеке танысып, жаңа ортаға бейімделу мүмкіндіктерін бағалау мақсатында отбасымен бірге Каталонияға барды.
Sky Sports мәліметінше, «көк-гранаттылармен» байланыс шешуші кезеңге өткен, дегенмен мадридтік «Реал» да осы бағытта белсенді жұмыс жүргізуде. Сонымен қатар, мюнхендік «Бавария» мен «ПСЖ» да жас шабуылшыны өз қатарына қосуға талпынып жатыр, алайда бұл бәсекеде Ла Лига өкілдері көш бастап тұрған көрінеді. Bild басылымының нақтылауынша, Германия чемпионы жасөспірімнің ортасымен қыс мезгілінің аяғынан бері келіссөз жүргізіп келеді — бұл процеске Макс Эберльдің сенімді өкілі Бастиан Верншайд тікелей тартылған. Дегенмен, мюнхендіктердің спорттық директоры Кристоф Фройнд жасөспірімнің ерекше қабілеттерін жоғары бағалағанымен, байланыстар туралы ресми мәлімдеме жасаудан бас тартты.
Трансферлік үдерістегі тағы бір кедергі — ФИФА-ның бюрократиялық талаптары: Ұлыбритания азаматтары кәмелетке толғанға дейін Еуропалық Одақ клубтарында ресми түрде тіркеле алмайды. Алайда ойыншының әкесінің ирландиялық тамыры және анасының кипрлік тегі арқасында бұл тығырықтан шығуға болады, бұл оған ЕО төлқұжатын жедел тәртіппен рәсімдеуге мүмкіндік береді.
Мұндай үлкен қызығушылыққа футболшының «Олд Траффордта» жасаған демаршы түрткі болды. The Telegraph мәліметі бойынша, шабуылшы клубтан кетуге түбегейлі бел буып, тіркеу лицензиясын қайтарып алуды талап еткен және жақында УЕФА Жасөспірімдер лигасында «Сабах» қақпасына жасаған хет-тригінен соң әлеуметтік желілерінен манчестерліктерге қатысты барлық жазбаларды өшіріп тастаған. Манкуниандықтардың академиясы бұл қадамды күтпеген соққы ретінде қабылдады: форвард 11 жасынан бастап сонда тәрбиеленіп, өткен маусымда U-18 біріншілігіндегі 23 матчта 23 гол соғып, турнирдің үздік ойыншысы атанған, ал тамыз айында «МЮ» негізгі командасы тарихындағы ең жас дебютант ретінде тіркелген еді.