Оджо — «Ливерпуль» академиясының түлегі және бір кездері мерсисайдтықтардың негізгі командасы сапында алаңға шыққан. Мансабы барысында ол Англияда «Уиган», «Вулверхэмптон», «Фулхэм», «Кардифф Сити» және «Миллуол» клубтарында ойнады, Францияда — «Реймс» үшін, Шотландияда — «Рейнджерс» үшін, Бельгияда — «Кортрейк» үшін, ал Словенияда — «Марибор» үшін өнер көрсетті.
Клубтық мансабынан бөлек, Оджо Англияның жасөспірімдер және жастар құрамаларына шақырылды. Англия U20 құрамасының сапында ол әлем чемпионы атанды.
«Ресми: 29 жастағы ағылшын вингері Олувасейи Бабаджиде, Шейи Оджо деген атпен көбірек танымал, «Ақтөбе» футбол клубымен келісімшартқа қол қойды... Қызыл-ақ отбасыға қош келдің, Шейи! «Ақтөбемен» бірге үлкен жетістіктерге жетуді тілейміз!» — делінген баспасөз қызметінің хабарламасында.
Ойыншының соңғы клубы «Марибор» болды. Өткен маусымда Оджо барлық турнирде 31 матч өткізіп, үш гол соғып, бес нәтижелі пас берді.