Q Football

«Біз дүрбелеңге ермеуіміз керек»: Фабрегас «Комоны» қарапайымдылық сақтауға шақырды

«Біз дүрбелеңге ермеуіміз керек»: Фабрегас «Комоны» қарапайымдылық сақтауға шақырды

Еурокубоктардағы италиялық дебютант сырт алаңда нәтижелілік рекордын орнатты, алайда команданың бас бапкері жас ойыншыларынан жерге нық тұрып, эйфорияны ұмытуды талап етеді.

Фабрегас мұндай жеңіс командаға масайраудың емес, жұмысқа одан әрі жауапкершілікпен қараудың қажет екенін ескертті.

«Бұл «Комо» үшін, барлық жанкүйеріміз үшін және мансабын енді бастап жатқан көптеген жас ойыншы үшін тамаша кеш болды. Бірақ біз аяқтарымызды жерге нық басып, қарапайым болып, тынымсыз еңбектенуді жалғастыруымыз керек. Біз үнемі осыны үйренуге тиіспіз», - деді ол ойыннан кейін.

Бас бапкердің сөзінше, жаттықтырушылар штабы қазір ұжымды «жұлдыз ауруынан» сақтауға күш салады.

«Мұны дәл қазір бойға сіңіріп алуымыз керек - өз ажиотажымызға еріп кетпеу үшін, не «жұмыс бітті» деп ойлап қалмау үшін. «Жарайды, бұл жақсы күн болды, енді алға жылжиық та, жақсы ойын көрсетуді жалғастыруға тырысайық» деп айтуды үйренуіміз керек», - деп түйді Фабрегас.

Лига 1-де тоғызыншы орында тұрған «Лансқа» қарсы ойын «Комо» шабуылының нағыз шоуына айналды. Кездесудің басты кейіпкері шабуылшы Дувикас болды: ол клубтың еурокубоктардағы тарихындағы алғашқы хет-тригін жасап, Чемпиондар лигасында хет-трик тіркеген үшінші грек футболшысы атанды.

Нәтиженің ірі болуына Нико Пас та айтарлықтай үлес қосты. Аргентиналық талант 40-минутқа дейін екі голдік пас беріп, өзі де әдемі гол соғып, есепті 3:0-ге жеткізді. Бұдан бөлек, «Ланс» қақпасына Лукас Да Кунья, Марк-Оливер Кемпф, Маттиа Либерали, Мартин Батурина және Маттео Папаччоли де бір-бірден гол енгізді.

Бұл жеңіс еурокубоктардағы тұңғыш маусымын өткізіп жатқан «Комоға» бірден бірнеше тарихи көрсеткіш әкелді. Біріншіден, сырт алаңда соғылған 9 гол - Чемпиондар лигасы тарихындағы қонақ командалардың абсолют рекорды. Сонымен қатар бұл бір матчтағы жалпы нәтижелілік рекордын да қайталады: бұған дейін дәл осындай көрсеткішті «Бавария» тіркеген.

Екіншіден, сегіз гол айырмасымен келген жеңіс турнирдің ең ірі доп айырмасы рекордтарын да қайталады. Бұған дейін мұндай нәтижеге «Ливерпуль» (2007 жылы «Бешикташқа» қарсы 8:0) және мадридтік «Реал» (2015 жылы «Мальмеге» қарсы 8:0) қол жеткізген.

Үшіншіден, Чемпиондар лигасының төрт турында «Комо» 19 гол соқты. Бұл көрсеткіш трофейдің қазіргі екі дүркін иегері «Пари Сен-Жерменнің» нәтижесінен небәрі бір голға кем.

Фабрегас шәкірттері осы табыстан кейін Чемпиондар лигасының жалпы кестесінде төртінші орынға көтерілді. Ал Италия чемпионатында «Комо» А сериясының 10 турында 23 ұпай жинап, төртінші орында тұр және көшбасшы «Лациодан» бес ұпайға қалып келеді. Команданың сабыры мен қарапайымдылығы жақын арада тағы сыналады: осы жексенбіде «Комо» чемпионатта екінші тұрған «Интермен» кездеседі.