Луис Энрикенің шәкірттері сырт алаңда «Гаврды» 5:1 есебімен сенімді жеңді. Алаң иелері Джош Майяның голының арқасында күтпеген жерден есеп ашқанымен, париждіктер көп ұзамай ойын тізгінін өз қолына алды. Мика Годтс таразы басын теңестірсе, Ашраф Хакими қонақтарды алға шығарды. Екінші таймда марокколық қорғаушы тағы екі рет мергендік танытып, хет-трик авторы атанды. Тағы бір голды Сенни Маюлю соқты. Елордалық клуб 20 ұпай жинап, чемпионаттағы көшбасшылығын сақтап қалды.
«Лилль» өз алаңында «Лансты» 1:0 есебімен жеңді. Принципті қарсыластар арасындағы кездесу ұзақ уақыт бойы голсыз өткенімен, ойын соңында Оливье Жиру алаң иелеріне үш ұпай сыйлады. Тәжірибелі француз шабуылшысы 86-минутта мергендік танытып, командасын солтүстік дербиде жеңіске жеткізді.
Турдың ең нәтижелі кездесуі «Ницца» мен «Ренн» арасында өтіп, алаң иелерінің 5:2 есебіндегі жеңісімен аяқталды. Матчтың басты қаһарманы Элье Ваи атанды. Ол екі пенальтиді сәтті орындап, хет-трик жасады. Жонатан Клосс пен Мохамед Амура да бір-бір голдан соқты. Қонақтар сапында Себастьян Шиманьский мен Булайе Диа көзге түскенімен, команда ірі жеңілістен құтыла алмады.
«Страсбур» да ірі жеңіске жетіп, «Осерді» 5:1 есебімен талқандады. Алғашқы голды Дариу Эссугу соқты, кейін Марсьяль Годо мен Конрад Хардер алаң иелерінің басымдығын арттырды. Камерон Арчер қонақтардың есеп айырмасын қысқартқанымен, кездесудің соңында Жессим Ясин дубль жасап, қорытынды есепті белгіледі. Осылайша, Эльзас клубы сәтсіз сериясын тоқтатты.
«Париж» күтпеген жерден «Монаконы» 3:1 есебімен жеңді. Лассин Синайоко бірінші таймда дубль жасап, алаң иелеріне екі доп басымдығын қамтамасыз етті. Үзілістен кейін Фоларин Балогун монегаскіліктердің есеп айырмасын қысқартты, алайда Пабло Пажис екі голдық басымдықты қайта қалпына келтірді. Париждік клуб 17 ұпай жинап, чемпионаттағы сәтті өнер көрсетуін жалғастырды.
«Лион» өз алаңында «Анжені» 2:0 есебімен тізе бүктірді. Эрнест Нуама бірінші таймда есеп ашса, кездесудің соңына қарай Корантен Толиссо алаң иелерінің басымдығын нығайтты. Лиондықтар қатарынан екі жеңілістен кейін үш ұпай еншіледі.
«Марсель» «Тулузаны» 2:0 есебімен сенімді жеңді. Амин Харит бірінші минутта-ақ прованстықтарды алға шығарса, көп ұзамай Амин Гуири есеп айырмасын ұлғайтты. Екі жылдам голдан кейін алаң иелері басымдығын соңғы ысқырыққа дейін сақтап, чемпионаттағы бесінші жеңісіне жетті.
«Труа» өз алаңында «Ле-Манды» 2:0 есебімен жеңді. Бірінші таймда Мухамед Диоп есеп ашса, үзілістен кейін Исмаэль Бура екінші голды соқты. Бұл алаң иелерінің биылғы маусымдағы екінші жеңісі болып, сәтсіз сериясын тоқтатуға мүмкіндік берді.
Тур «Бресттің» сырт алаңда «Лорьянды» 2:0 есебімен жеңуімен аяқталды. Голсыз өткен бірінші таймнан кейін Людовик Ажорк қонақтарды алға шығарды, ал қосымша уақытта Ноа Эджума қорытынды есепті белгіледі. «Брест» 12 ұпай жинап, осы көрсеткіш бойынша қарсыласымен теңесті.
Турнирлік кесте: 1. ПСЖ — 20 ұпай, 2. «Лилль» — 18, 3. «Лион» — 17. Толық кесте осында.
Сұрмергендер: 1. Синайоко — 8 гол, 2. Леполь — 7, 3. Гуири — 6. Толық тізім осында.
Ассистенттер: 1. Товен — 7 ассист, 2. Кассерес — 5, 3. Синайоко — 5. Толық тізім осында.