Басылымның жазуынша, өткен маусымда Бастони «Барселонаның» қорғаныс ортасын күшейту жоспары бойынша негізгі кандидаттардың бірі болған. Қаңтар айында клубтың спорт директоры Деку жоғары деңгейде ойнаған тәжірибесі бар солақай қорғаушы қажет екенін айтып, италиялық футболшыға қатысты жұмысты бастап кеткен.
Дереккөз мәліметі бойынша, сол кезеңде тараптар 2031 жылға дейінгі жеке келісімшарттың шарттарын да алдын ала келісіп үлгерген. Бірақ соңғы шешім Фликтің қолында қалған. Мамырда неміс маманы бұл нұсқаны құптамаған: ол Жерар Мартинді орталық қорғаушы ретінде қарастырып, басқа позицияларды күшейтуді маңыздырақ санаған.
Қазір «Барселона» қорғанысты күшейтудің жаңа жолдарын қайта қарастырып отыр, ал Бастонидің есімі әлі де басым бағыттардың қатарында. Бұған дейін каталондықтар бұл трансферден бас тартса да, 27 жастағы қорғаушы жаңа ұсынысты тыңдауға дайын екені айтылады.
Сонымен қатар Бастони «Интердегі» жағдайына көңілі толатынын да жасырмайды. Ол капитандар тобына кіреді, миландық клубтың деңгейін жоғары бағалайды, ал қазіргі келісімшарты 2028 жылға дейін жарамды. Бұған қоса, ол «нерадзурридегі» ең жоғары жалақы алатын ойыншылардың қатарында.
Mundo Deportivo дерегінше, ықтимал ауысымның басты шарты - Фликпен жеке сөйлесу. Бастони бапкердің өз аузынан «Барселонаның» оны жобаның маңызды ойыншысы ретінде көретінін, яғни бұл тек спорттық басшылық ұсынған кандидат емес екенін естуді қалайды.