Өткен жазда «Марсель» бірнеше футболшысымен қоштасуға мәжбүр болып, құрамын іс жүзінде күшейткен жоқ. Басшылық 2026/27 маусымын өтпелі кезеңнің бастауы ретінде қарастырып отыр, ал басты мақсат — қаржылық жағдайды сауықтыру.
«Бес жылға созыла ма — білмеймін. Бірақ бір маусымнан ұзақ болатыны анық. Меніңше, 2026/27 маусымы — қайта құрудың негізін қалайтын кезең», — деді Ришар.
Президент кірістердің ықтимал төмендеуіне ерекше назар аударды. Оның айтуынша, айналымның жартысынан астамын жоғалту тек спорттық нәтижелерге емес, клубтың өз болашағына да қауіп төндіруі мүмкін.
««Марсель» болғаны үшін ғана клуб мәңгі өмір сүреді деп ойлайтындар қателеседі», — деді басшы. Ол мысал ретінде «Бордоның» қаржылық мәселелерін атады.
Ришар клубтың бұрынғы даму моделін де сынға алды. Оның пікірінше, «Марсель» трансферлерге тым көп қаражат жұмсап, өз академиясына жеткілікті инвестиция салмаған.
Жаңа бағыттың негізгі мақсаттарының бірі — соңғы жылдары қаржылық шығындарды тұрақты түрде жауып келген клуб иесі Фрэнк Маккортқа тәуелділікті азайту.
«Қанша жерден ауқатты болса да, акционердің жақсы ниетіне үнемі тәуелді болып өмір сүруге болмайды», — деді Ришар.
Енді басшылық шығындар клубтың нақты мүмкіндіктеріне сай келетін тұрақты модельге көшуді жоспарлап отыр. Сонымен бірге Ришар мұндай қайта құрудың жақын уақытта команданың спорттық нәтижелеріне әсер етуі мүмкін екенін мойындады.