«Манчестер Юнайтедтің» қомақты қаржылық ұсыныс жасауға дайындығына қарамастан, «Барселона» қысқы трансфер терезесінде жартылай қорғаушы Фермин Лопесті сату мүмкіндігін түбегейлі жоққа шығарды. Инсайдер Маттео Моретто мен Sport басылымының мәліметінше, манкуниандықтар испаниялық ойыншының қолжетімділігі туралы мәлімет алып та үлгерген, алайда каталониялық клуб басшылығы ықтимал мәміленің тамырына бірден балта шапты.
«Көк-анар түстілердің» спорттық директоры Деку клубтың ешқандай жағдайда келіссөз үстеліне отырмайтынын қадап айтты, ал «Ла Масия» түлегінің қазіргі келісімшарты 2031 жылға дейін жасалған әрі ол туған командасында барынша бақытты. Ағымдағы маусымда 23 жастағы хавбек тамаша спорттық бабына еніп, каталондықтардың барлық кездесуінде дерлік алаңға шығып, 5 гол мен 4 нәтижелі паспен көзге түсті.