«Ювентустың» бас бапкері Лучано Спаллетти жексенбі күні Италия А сериясында бапкер ретінде 600-ші матчын өткізіп, айтулы межеге жетті. «Альянц Стэдиумдағы» мерейтойлық матч «бьянконеридің» Давиде Никола жаттықтыратын «Венецияны» 4:0 есебімен ойсырата жеңуімен аяқталды. Дегенмен бірінші тайм алаң иелері үшін өте қиын өтіп, өз жанкүйерлерінің наразылық ысқырығымен аяқталған еді.
Ойыннан кейін тәжірибелі маман қызметінен кетуі мүмкін деген қауесеттер аясында журналистердің қысым мен алдағы мансаптық мақсаттары туралы сұрағына әзілмен жауап берді: «Жұрттың айтып жүргенін ескерсек, 600 матчтан кейінгі мақсатым қандай? Жауап — 601-ші матч, өйткені футболда бәрі болуы мүмкін».
Ойындағы бетбұрыс үзілістен кейін бірден болды: жарақат алған Керим Алайбеговичтің орнына шабуылшы Ник Вольтемаде алаңға шықты. Форвард шабуылды бірден жандандырып, Уэстон Маккеннидің сәтсіз соққысынан кейін қайтқан допты қақпаға бағыттап, есеп ашты. Бұл гол ірі жеңістің бастамасы болды: артынша Тён Копмейнерс пен Хуан Кабаль гол соқты, ал Рандаль Коло-Муани өзі пенальти алып, оны сенімді орындап, соңғы есепті орнатты. DAZN Italia-ға берген сұхбатында Спаллетти команданы матчтың екінші жартысындағы өзгерісі үшін мақтап, ойыншылардың дұрыс шешімдерді көбірек қабылдай бастағанын, пас беруде икемдірек қимылдап, командалық бірлік танытқанын атап өтті.
Осы жеңістің арқасында «Ювентус» 21 ұпай жинап, турнир кестесінде алтыншы орынға көтерілді және төртінші орында тұрған «Комодан» айырмасын бес ұпайға дейін қысқартты. Тактикалық өзгерістерге тоқталған Спаллетти Коло-Муанидің сол қапталда ойнауға үйренгенін мойындады. Алайда қанаттағы ойыншылар арасындағы жоғары бәсекеге байланысты — құрамдағы орынға Нико Гонсалес, Франсишку Консейсау және Эдон Жегрова таласып жатыр — француз футболшысы командаға шабуылдың ортасында қажет. Бапкердің айтуынша, шабуылшы қорғаушының бақылауында қақпаға арқасын беріп тұрып доп алғанына наразылық білдірмей, допты қабылдау үшін белсендірек ашылып, өзі кеңістік жасауы керек.
Бапкер Эдон Жегрованың ойынына да жеке тоқталып, оны ерекше таланты бар футболшы деп атады, бірақ алдағы қарбалас апта қарсаңында тәртіпті күшейтуге шақырды. Сол аптада туриндіктер бейсенбі күні Еуропа лигасында «Омонияны» қабылдап, жексенбіде «Комомен» сырт алаңда ойнайды: «Жегрова — керемет ойыншы, өйткені кейде ол ешбір тактикалық кітапта жазылмаған нәрселерді жасайды. Бірақ кейде ойын эпизодтарынан тыс қалып, доптан айырылып қалады. Сондай бір сәтте Бремер бізді құтқаруға мәжбүр болды. Ара-тұра жарқ ете қалу жеткіліксіз — матч бойы зейінді сақтау керек».
