Сербиялық шабуылшы Душан Влахович 1 шілдеден бері еркін агент мәртебесінде жүр. Кезінде «Ювентус» оны 75 миллион еуроға сатып алғанымен, Туриндегі ойыны тұрақсыз болғандықтан, клуб онымен келісімшартты ұзартпады. Қазіргі таңда 26 жастағы шабуылшы трансфер нарығындағы ең тартымды ойыншылардың бірі саналады, алайда бір айға жуық уақыт өтсе де, ол әлі жаңа команда тапқан жоқ.
Оған түркиялық «Бешикташтан» өте тиімді ұсыныс түсті: қол қойғаны үшін 5 миллион еуро бонус және жылына шамамен 10 миллион еуро жалақы. Алайда, Влахович Ыстамбұлда болғанымен, нақты жауап қатқан жоқ. Бұл жағдай түркиялық клубты жалықтырып, олардың шабуылшыны алу ниеті бәсеңдей бастады.
Влаховичтің шешім қабылдауға асықпауының басты себебі — ол «Барселонаны» күтіп отыр. Marca басылымының хабарлауынша, ойыншы каталондық клубтың спорт директоры Декумен кездесіп үлгерген. Душан Роберт Левандовски кеткеннен кейін босаған орынды және ПСЖ-ға ауысуы мүмкін Ферран Торрестің орнын баса алатынына сенеді. Каталониялықтар шабуылшыға Түркиядағыдай көп жалақы бере алмайтынын ескерткенімен, ойыншының «Камп Ноуда» ойнау арманы бәрінен биік тұр. Бас бапкер Ханс-Дитер Флик прессинг жасай алатын шабуылшыны қалағанымен, Деку мен клуб президенті Жоан Лапортаға Влаховичтің еркін агент ретінде тегін келетіні қаржылық тұрғыдан өте тиімді болып отыр. Әзірге келіссөздер кідірісте, бірақ кез келген сәтте «Барселона» бұл трансферді қайта жандандыруы мүмкін.