Германия чемпионатының 9-туры «Гамбург» пен Мёнхенгладбахтың «Боруссиясы» арасындағы кездесумен басталды — 3:1. Миро Мухайм алыстан дәл соққы жасап, алаң иелерін алға шығарды. Алайда үзіліске дейін Джо Скалли есепті теңестірді. Екінші таймның басында Ко Итакура алаңнан қуылып, қонақтар он ойыншымен қалды. Сан басымдығын Шафик Нанджа тиімді пайдаланса, Альберт Грёнбек айып алаңының сыртынан әдемі гол соғып, «Гамбургтің» жеңісін түйіндеді.
«Падерборн» мен Франкфурттың «Айнтрахты» 2:2 есебімен тең түсті. 23-минутта Йонатан Буркардт есеп ашқанымен, үзіліске дейін Рафаэль Обермайр таразы басын теңестірді. Екінші таймда Марвин Пирингер пенальтиді сәтті орындады. Көп ұзамай Элиас Баум алаңнан қуылып, қонақтар он ойыншымен қалды. Соған қарамастан «Айнтрахт» жеңілістен құтылды. Қосымша уақытта Йонатан Буркардт бұрыштама добын орындауға қосылған қақпашы Ноа Атуболудың пасынан кейін дубль жасады.
«Бавария» сырт алаңда «Майнцты» 2:1 есебімен жеңді. 14-минутта Йозуа Киммих айып алаңының сыртынан дәл соққы жасап, есеп ашты. Үзілістен кейін Леннарт Карл мюнхендіктердің басымдығын арттырды. Екі голға да Харри Кейн нәтижелі пас берді. Қосымша уақытта Филлип Титц есеп айырмасын қысқартқанымен, алаң иелері жеңілістен құтыла алмады. Венсан Компани шәкірттері чемпионаттағы жеңіліссіз сериясын сақтап қалды.
«РБ Лейпциг» «Аугсбургті» 5:2 есебімен ойсырата жеңді. Қонақтар бірінші минутта Антон Каденің голының арқасында алға шықты. Алайда кейін алаң иелері ойын тізгінін толықтай өз қолына алды. Эзекиель Банзузи, Кристофер Нкунку және Давид Раум үзіліске дейін «Лейпцигке» басымдық сыйлады. Екінші таймда Ромуло мен Кристоф Баумгартнер есепті ірі нәтижеге жеткізді. Ал кездесудің соңында Ученна Огунду қонақтардың екінші голын соқты. Екі нәтижелі пас берген Брайан Груда матчтың басты қаһармандарының бірі атанды.
Дортмундтың «Боруссиясы» өз алаңында «Эльферсбергті» 2:1 есебімен жеңді. Голсыз өткен бірінші таймнан кейін 55-минутта Феликс Нмеча есеп ашып, араға 16 минут салып дубль жасады. Қонақтар Ноэль Футкеудің шалқалай теуіп соққан әдемі голымен жауап бергенімен, есепті теңестіре алмады. Нико Ковач шәкірттері Бундеслигадағы жеңіліссіз сериясын тоғыз матчқа жеткізді.
«Штутгарт» «Вердерді» 1:0 есебімен минималды жеңді. Кездесудегі жалғыз голды жетінші минутта Гриша Прёмельдің пасынан кейін Максимилиан Миттельштедт соқты. Бремендік команда есепті теңестіруге тырысып, әсіресе матчтың соңында белсенді шабуылдады. Алайда алаң иелерінің қорғанысы қысымға төтеп берді. Осылайша «Вердер» чемпионаттағы жеті матчқа созылған жеңіліссіз сериясынан кейін алғаш рет ұтылды.
«Байер» Рейн дербиінде сырт алаңда «Кёльнді» 2:1 есебімен жеңді. Жетінші минутта Алейш Гарсия айып добын тікелей қақпаға бағыттап, есеп ашты. Кездесудің соңына қарай Патрик Шик қонақтардың басымдығын арттырып, биылғы чемпионаттағы сегізінші голын соқты. Қосымша уақытта Саид Эль-Мала ағасы Малектің нәтижелі пасынан кейін есеп айырмасын қысқартты. Алайда леверкузендіктер жеңісті сақтап қалды.
«Фрайбург» Берлиннің «Унионын» 2:0 есебімен сенімді жеңді. Бірінші тайм голсыз аяқталса, үзілістен кейін қонақтардың қорғаушысы Рани Хедира допты өз қақпасына бағыттап алды. 67-минутта Юито Судзуки алаң иелерінің басымдығын арттырды. Кездесудің соңында Винченцо Грифо пенальтиді жүзеге асыра алмады. Дегенмен бұл «Фрайбургтің» чемпионаттағы алтыншы жеңісіне кедергі болған жоқ.
«Хоффенхайм» турды «Шалькені» 2:1 есебімен жеңіп аяқтады. Оныншы минутта Фисник Аслани қақпашы Лорис Кариустың қателігін пайдаланып, есеп ашты. Көп ұзамай ол Тим Лемперлеге нәтижелі пас беріп, алаң иелерінің басымдығын арттырды. Үзілістен кейін қонақтар шабуылдағы белсенділігін күшейтіп, 81-минутта Джуниор Адаму есеп айырмасын қысқартты. Тартысты өткен соңғы минуттарға қарамастан, «Хоффенхайм» жеңісті сақтап қалды.
Турнирлік кесте: 1. «Бавария» — 21 ұпай, 2. «Боруссия» Дортмунд — 21, 3. «Фрайбург» — 19. Толық кесте осында.
Сұрмергендер: 1. Фюллькруг — 9 гол, 2. Шик — 8, 3. Олисе — 6. Толық тізім осында.
Ассистенттер: 1. Кейн — 7 ассист, 2. Нуса — 7, 3. Грюлль — 6. Толық тізім осында.