«Шилтонды басып озу - сөз жоқ, ең үлкен жетістіктердің бірі. Бұл ең жоғары деңгейдегі тұрақтылықты көрсетеді деп ойлаймын. Кез келген ұлы ойыншы жыл сайын нәтиже көрсеткісі келеді. Бұл - көзге көрінбейтін еңбектің, іске берілгендіктің және адамдар байқамайтын, бірақ менің бабымда болып, денсаулығымды сақтауыма көмектесетін сәттердің айғағы», - деді ол.
Форвард Англия құрамасындағы голдар саны бойынша да көш бастап тұр: оның еншісінде рекордтық 91 гол бар. Бірақ Кейн мұнымен тоқтағысы келмейтінін жасырмады. «Әрине, бұл - мансабымдағы ең маңызды межелердің бірі. Ал ары қарай не болатынына келсек - мені білесіздер, өзіме шектеу қойғанды ұнатпаймын. Соңғы оқу-жаттығу жиынында Англия құрамасы сапындағы 100 гол туралы сөйлестік, бұл да мүмкіндігінше тезірек жеткім келетін керемет шың. Біз турнирлерде жақсы өнер көрсетіп жүрміз, шешуші кезеңдерге дейін жетеміз, демек алда матчтар жеткілікті. Қазір өзімді шынымен өте жақсы сезінемін, әрі алда тағы талай жыл бар - тағы нені бағындыра алатынымды көреміз», - деп қосты ол.
Кейннің жеке көрсеткіштері әсерлі болғанымен және «Бавария» сапында Германия чемпионы атағын екі рет жеңіп алғанына қарамастан, Англия құрамасымен әлі ірі трофей ұта алған жоқ. Ұлттық команда Еуропа чемпионатының қатарынан екі финалында жеңіліп, биылғы әлем чемпионатының жартылай финалында Атлантада Аргентинадан жеңілді.
Шабуылшының айтуынша, құрамадағы басты мақсаты өзгермеген. «Англия құрамасымен командалық, үлкен трофей ұту - менің ең үлкен арманым. Менің ең үлкен арманым әрдайым Еуропа чемпионатын, әлем чемпионатын немесе, үміттенемін, екеуін де жеңу болды. Мұның қаншалықты қиын екенін білемін, сондықтан бұған жетуге аса қатты ынталымын. Клубта да, құрамада да жанымда керемет командалар бар, сондықтан алда қызықты кезең күтіп тұр деп сенемін», - деп мойындады Кейн.
Кейн жеке тоқталған тағы бір тақырып - акупунктура маманы, доктор Алехандро Элорриага Клараконың көмегі. Олар 2020 жылы, тобық жарақаттары жиілеп, шабуылшының тізе асты сіңірі дерлік толық үзіліп кете жаздаған кезеңде бірлесіп жұмыс істей бастаған. Дәрігер Канадада тұрса да, ай сайын бірнеше күнге арнайы ұшып келіп, футболшымен жұмыс істеп тұрады.
«Содан бері біз іс жүзінде ай сайын бірнеше күн бойы осы инелермен, жүйке жүйесіне қатысты дүниелермен жұмыс істеп келеміз. Шынымды айтсам, осы жұмыс пен оның көмегінсіз мансабымның дәл осы кезеңіне жетер ме едім - білмеймін. Бұл - керемет олжа болды. Соңғы жеті жылда мен 10-15 ойынды ғана өткізіп алдым, ал оған дейінгі жеті жылда 60-70 матчқа дейін жіберіп алатынмын. Тек осы тұрғыдан алғанда да оның әсер еткенін білемін, ал 33 жасымда ойнап жүрген деңгейімнің өзі-ақ біздің істеп жатқанымыздың бәрі дұрыс бағытта екенін көрсетеді», - деді Англия капитаны.
Дегенмен Хорватияға қарсы матчта Англия құрамасы толық құрамда болмайды. Бас бапкер Томас Тухель қорғаушылар Эзри Конса мен Джед Спенстің бұл ойынды өткізіп алатынын мәлімдеді. Оның айтуынша, екеуі де Испанияға қарсы келесі кездесуге дейін қатарға қосылады деп күтіліп отыр.