Испаниялық Ла Лиганың президенті Хавьер Тебас ФИФА-ның Әлем чемпионаты құқықтарының бір бөлігін жеке инвесторларға сату жоспарынан бас тартуына қатысты пікір білдіріп, ұйым басшысы Джанни Инфантиноны қызметінен кетуге шақырды.
Тебас Х (бұрынғы Twitter) әлеуметтік желісіндегі парақшасында ФИФА-ның бұл шешімін жақсы жаңалық деп атағанымен, мәселенің толық шешілмегенін ескертті. «Футбол қауымдастықтары, лигалар мен ойыншылар бұл шешіммен тоқтап қалмауы керек. Мәселе әлдеқайда тереңде. Біз саяси араласудан кейін Фоларин Балогунның қызыл қағазының жойылуын, АҚШ Конгресінің Инфантиноға қатысты бастаған тергеуін, ФИФА-дағы жемқорлық істерінің жабылуын, Әлем чемпионатына билет бағасының шарықтап кетуін және басқалармен ақылдаспай қабылданған халықаралық күнтізбе шешімдерін ұмыттық па?» – деп жазды ол.
Ла Лига басшысының сөзінше, басты мәселе билікті бір адамның қолына шоғырландыратын басқару моделінде жатыр. Ол әлемдік футболға сенімді қайтаратын және шешімдерді барлық қатысушылармен бірлесіп қабылдайтын жаңа басшылық қажет екенін баса айтты. «Бір ұсынысты қайтарып алу бұған дейін болған оқиғаларды өшіре алмайды. Бұл бар болғаны айсбергтің шыңы ғана», – деп түйіндеді Тебас.
Айта кетейік, Инфантино дайындаған Әлем чемпионатының құқықтарын сату жоспары оған жеке өзіне ондаған миллион фунт стерлинг табыс әкелуі мүмкін еді. Бұл келіссөздер АҚШ президенті Дональд Трамптың әкімшілігіне жақын тұлғалармен жүргізілген деген ақпарат бар. Көптеген футбол ұйымдары бұл жоспарды қатаң айыптаған болатын.