Мәміленің жалпы құны €100 млн-ға дейін жетуі мүмкін.

Ақпаратқа сәйкес, ағылшын клубы футболшы үшін €95 млн (£81,4 млн) тұрақты төлем жасайды. Ал тағы €5 млн түрлі бонустар ретінде қарастырылған.

Буадди жексенбі күні Франция чемпионатындағы «Анже» командасына қарсы матчқа «Лилльдің» өтініміне енбеді. Алдағы күндері марокколық футболшы Манчестерде медициналық тексерістен өтіп, содан кейін трансфер ресми түрде рәсімделуі тиіс.

Буаддидің негізгі позициясы — тірек жартылай қорғаушы. 18 жастағы футболшы биыл жазда Марокко құрамасымен әлем чемпионатына қатысып, команданың алты матчының бесеуінде алаңға шықты. Соның ішінде Францияға қарсы ширек финалдық кездесу де бар. Марокко бұл ойында 0:2 есебімен жеңілді.

Соған қарамастан, Буаддидің ұлттық құрама сапында небәрі сегіз ойыны бар. Ол Марокко құрамасындағы дебютін 2023 жылдың қазан айында жасады. Ал «Лилль» сапында Лига конференциясының топтық кезеңіндегі матчта алғаш рет алаңға шыққан кезде футболшы небәрі 16 жаста үш күндік еді. Осылайша ол турнир тарихындағы ең жас ойыншы атанды.

Буаддидің трансферіне жұмсалатын қаржының едәуір бөлігі «Манчестер Ситидің» Родриді «Барселонаға» £65 млн-ға сатуынан түскен қаражат есебінен өтелмек. Бұл трансфер өткен аптада жүзеге асқан.

Ағылшын клубы осы жазда Эллиот Андерсонды да £116 млн-ға сатып алған болатын. Осылайша Буаддидің трансфері аяқталған жағдайда, «Манчестер Ситидің» осы жазғы трансферлік науқандағы жалпы шығыны £200 млн-ға жуықтайды.

Алайда Буадди бірден негізгі құрамның тұрақты ойыншысына айналмауы мүмкін. Себебі Андерсон тірек жартылай қорғаушы позициясында да, орталық жартылай қорғаушы ретінде де ойнай алады.

Сонымен қатар «Манчестер Сити» «Челсидің» жартылай қорғаушысы Энцо Фернандеске де қызығушылық танытып отыр. Лондондық клуб аргентиналық футболшы үшін £120 млн талап етуде. Алайда Манчестер өкілдері бұл соманы тым жоғары деп санайды.

Пікірлер (0)

Пікірлер (0)