Нидерланд құрамасының бас бапкері Рональд Куман 2026 жылғы әлем чемпионатындағы сәтсіз нәтижеден кейін ресми түрде қызметінен кетті.

Куманның бұл шешімі «қызғалдақтар елі» 1/16 финалда Мароккодан сенсациялық түрде ұтылып, турнирден шығып қалғаннан кейін бір тәулік өткен соң белгілі болды. Аталған кездесудің негізгі уақыты 1:1 есебімен аяқталып, пенальти сериясында марокколықтар 3:2 есебімен басым түсті.

Куман қызметінен кету туралы шешімін қазір отбасына көбірек уақыт бөлгісі келетіндігімен түсіндірді.

Нидерланд маманының жұмыстан кетуі әлем чемпионаты кезіндегі бапкерлер ауысуының кезекті мысалы болды. Турнир барысында сәтсіз нәтижелердің салдарынан бірнеше танымал бапкер қызметінен кетті.

Олардың қатарында Тунис құрамасының бас бапкері Сабри Лямуши де бар. Ол әлем чемпионаттары тарихындағы ең жылдам қызметінен кеткен бапкер атанды. Федерация алғашқы турда Швециядан 1:5 есебімен жеңілгеннен кейін бірнеше сағат ішінде келісімшартты бұзды. Оның орнына Эрве Ренар тағайындалды.

Қызметінен кеткен тағы бір маман — Хон Мён Бо. Оңтүстік Корея құрамасы топтық кезеңнен аса алмай, Мексика мен Оңтүстік Африка Республикасынан жеңілді. Осыдан кейін жанкүйерлердің сыны күшейіп, ел басшылығы тарапынан да қысым болғаны хабарланды. Тіпті, Сеул әуежайына оралғанда жанкүйерлер бапкерді ашулы ұрандармен қарсы алған.

Өзгеріс Чехия құрамасында да болды. 74 жастағы Мирослав Коубек екі тараптың өзара келісімімен қызметінен кетті. Чехия А тобында соңғы орын алып, Оңтүстік Корея, ОАР және Мексикамен өткен үш матчта небәрі бір ұпай жинады.

Пікірлер (0)

Пікірлер (0)