«Қаспий» клубы құрамын бірден екі орталық жартылай қорғаушымен толықтырғанын мәлімдеді. Командаға 20 жастағы Аян Байдәулетов «Ақтөбеден» жалға алынды, ол маусым соңына дейін ақтаулық ұжымда ойнайды.

Клубтың инстаграм парақшасында Байдәулетов туралы: «Аян Байдәулетов - «Қаспий» құрамында! «Қаспий» футбол клубы құрамын жас әрі талантты жартылай қорғаушы Аян Байдәулетовпен толықтырды. Аян клубқа «Ақтөбеден» жалға беру шартымен қосылды. Жартылай қорғаушы маусым соңына дейін ақтаулық команданың намысын қорғайды. Жасы: 20. Бойы: 1,88 м. Позициясы: орталық жартылай қорғаушы», - деп жазылды.

Сондай-ақ ақтаулықтар тәжірибелі ойыншымен де келісім жасағанын хабарлады. «Қаспий» Беларусь құрамасының 30 жастағы жартылай қорғаушысы Владислав Климовичті қатарға қосты.

Клуб мәлімдемесінде: «Қаспий» футбол клубы құрамын тәжірибелі жартылай қорғаушы Владислав Климовичпен де толықтырды. Беларусь құрамасының ойыншысы кәсіби мансабында деңгейі жоғары чемпионаттарда өнер көрсетіп, мол тәжірибе жинаған. Енді Владислав ақтаулық клубтың намысын қорғайды. Жасы: 30. Бойы: 1,87 м. Позициясы: орталық жартылай қорғаушы», - делінген.

Байдәулетов биылғы маусымда «Ақтөбе» сапында 10 матч өткізген. Ал Климович 2026 жылдың 12 маусымында павлодарлық «Ертістен» кеткен: осы маусымда 16 ойынға қатысып, 2 голдік пас берген.

ҚПЛ-дің 13 турынан кейін «Қаспийдің» қоржынында 8 ұпай бар, команда турнир кестесінде 16-орында тұр.

Пікірлер (0)

Пікірлер (0)