Лондондық «Арсенал» мадридтік «Атлетикомен» шабуылшы Хулиан Альваресті алу бойынша қағидаттық келісімге келді. «Зеңбірекшілердің» бас бапкері Микель Артета аргентиналық футболшыны команданың шабуылын қайта құрудағы басты фигура ретінде қарастырып отыр.

Fichajes.net дерегінше, тараптар мәмілені алмасу форматына жақындатқан. Жоспар бойынша «Арсенал» 50 миллион еуро көлемінде кепілді төлем жасайды, ал швециялық форвард Виктор Дьёкереш «Атлетикоға» тікелей ауысуы тиіс. Ол өткен АПЛ-дегі чемпиондық маусымда 21 гол соғып, 3 нәтижелі пас берген.

Альварестің өзі мадридтік клубтан кетуді сұраған. Бұған оның Диего Симеонемен тактикалық көзқарастарының сәйкес келмеуі себеп болғаны айтылады. Өткен маусымда аргентиналық шабуылшы 20 гол соғып, 9 голдік пас тіркеген.

Дегенмен келісімнің тағдыры қазір ойыншының ұстанымына тіреліп тұр. 26 жастағы Альварес «Барселонаға» ауысуды армандайды және Англияға қайта оралу нұсқасын әзірге кейінге қалдырған.

Бұл жерде «Атлетиконың» позициясы қатаң: мадридтік клуб каталондықтарға футболшысын сатудан үзілді-кесілді бас тартып отыр, өйткені Ла Лигадағы тікелей бәсекелесін күшейткісі жоқ. Клуб басшылары «Барселонаның» 100 миллион еуролық ұсынысын да қабылдамаған. Испания клубтары үшін ойыншының бағасы өтемақы сомасына тең - 500 миллион еуро.

Алдағы сценарий «Барселонаның» қаржылық жағдайына да байланысты. Қаржылық қиындықтар бұл трансферді дерлік мүмкін емес етіп тұр. Егер каталондық бағыт біржола жабылса, Альварес АПЛ-ға көшу нұсқасын қайта қарастыруы ықтимал. Осы уақытта «Арсенал» ойыншының айналасымен белсенді келіссөз жүргізіп, оны алдағы апталарда Лондонға көшуге көндіруге тырысып жатыр.

Пікірлер (0)

Пікірлер (0)