Испанияның «Марка» басылымы әлем чемпионаты басталмай жатып-ақ Франция құрамасының төңірегінде дау шыққанын, оның өзегінде Килиан Мбаппе мен Н’Голо Канте тұрғанын жазды.

Қауесет Кот-д’Ивуармен өткен жолдастық матч (1:2) алдында түсірілген видеодан кейін өршіді: қосалқыдағы ойыншылар негізгі құраммен амандасқанда, «Канте Мбаппені елемей өтіп кетті» деген болжам пайда болды. Кадрда Канте өзге футболшылармен қол алысып, Мбаппенің жанынан өте берген, ал Мбаппе басқа жаққа қарап тұрғандай көрінген.

Сонымен бірге наурыздағы Колумбияға қарсы ойындағы эпизод қайта қозғалды: сол матчта Канте капитан болып шыққан, кейін алаңға қосылған Мбаппе Райан Шеркиден Канте таққан капитандық белгіні өзіне әкеліп беруді сұраған деген әңгіме тараған.

Дегенмен Францияның «TF1» арнасының журналисі Савер Депаржу бұл сөздерді теріске шығарды: «Бұл — мүлде қисынсыз әңгіме». «Марка» да Депаржуның пікірін келтіріп, «екеуінің арасында ешқандай проблема жоқ, әлгі видео ештеңені дәлелдемейді» деп жазды.

Франция 2026 жылғы ФИФА Солтүстік және Орталық Америкадағы әлем чемпионатының топтық кезеңінде Сенегал, Ирак және Норвегиямен бірге І тобына түскен.

Пікірлер (0)

Пікірлер (0)