Сондықтан қазіргі таңда әңгіме Сәтпаевтың тек маусым алдындағы матчтарда киетін 36-нөмірлі жейдесі туралы болып отыр.

«Челсиде» бұл нөмір әр жылдары Джо Кинанға, Патрик Бэмфордқа, Рубен Лофтус-Чикке, Кайл Скоттқа, Лукас Бергстрёмге, Габриэл Слонинаға және Дэвид Вашингтонға тиесілі болған. Клуб 36-нөмірді көбіне негізгі командаға енді ғана жақындап келе жатқан жас ойыншыларға бергені де атап өтіледі.

Осы тізімдегі ең нәтижелі ойыншы ретінде Рубен Лофтус-Чик көрсетіледі. Англиялық жартылай қорғаушы «Челсидің» негізгі құрамында дәл 36-нөмірмен дебют жасап, 2015/2016 маусымында 17 матч өткізіп, екі гол соққан. Кейін ол нөмірін ауыстырғанымен, жалпы лондондықтар сапында 155 ойынға қатысып, 13 гол соқты және төрт трофей жеңіп алды. Оның ішінде АПЛ-дің екі чемпиондығы, Еуропа лигасы мен УЕФА Суперкубогы бар.

Қалған футболшылар мұндай көрсеткішке жете алған жоқ. Джо Кинан «Челси» сапында ресми үш матчқа қатысса, Кайл Скотт бір-ақ рет алаңға шыққан. Дэвид Вашингтон үш мәрте қосалқы құрамнан ойынға қосылғанымен, гол соқпаған. Ал Патрик Бэмфорд, Лукас Бергстрём және Габриэл Слонина лондондықтардың негізгі командасында 36-нөмірмен дебют жасамады.

Осылайша, «Челсиде» 36-нөмірдің «жұлдызды» мәртебесі қалыптаспаған, ол дәстүрлі түрде жас футболшылар үшін бастапқы баспалдақ ретінде қолданылып келген. Сәтпаев үшін бұл нөмірмен негізгі құрамдағы жолын бастаған Лофтус-Чиктің тәжірибесі бағдар болуы мүмкін.

Пікірлер (0)

Пікірлер (0)