«Манчестер Сити» ойыншысы турнирдегі сегіз матчтың бәріне қатысқанымен, гол соқпады және голдік пас бермеді. Соған қарамастан «Фурия Роха» бүкіл турнирде небәрі бір ғана гол жіберді.

Статистикада да Родри алдыңғы қатардан көрінді: ол берілген пастар саны бойынша (803) және дәл жеткен пастар бойынша (753) көш бастады. Пас дәлдігі 94% болып, турнирдегі үздіктердің қатарына кірді.

ФИФА «Күміс допты» Аргентина құрамасының капитаны әрі шабуылшысы Лионель Мессиге берді. Месси бұған дейін 2014 және 2022 жылдардағы әлем чемпионаттарында да үздік ойыншы атанған.

Ал «Қола доп» Франция құрамасының шабуылшысы әрі капитаны Килиан Мбаппеге бұйырды. Ол 2026 жылғы әлем чемпионатының «Алтын бутсасын» да жеңіп алды. Мбаппе әлем чемпионаттарының екеуінде бірдей сұрмергендер бәсекесінде топ жарған тарихтағы алғашқы футболшы атанды.

Родри әлем чемпионатын, Чемпиондар лигасын және «Алтын допты» қатар ұтқан 11-ші ойыншы ретінде тіркелді. Ол 2023 жылы «Манчестер Сити» сапында Чемпиондар лигасын жеңіп алса, 2024 жылы France Football нұсқасы бойынша «Алтын доптың» иегері атанған.

Родриден бұрын бұл үш ірі жүлдені Ривалдо, Роналдиньо, Кака, Франц Беккенбауэр, Герд Мюллер, Зинедин Зидан, Усман Дембеле, Бобби Чарльтон, Паоло Росси және Лионель Месси жеңіп алған.

Турнирдің өзге марапаттары да белгілі болды. Испания құрамасының қақпашысы Унаи Симон үздік қақпашы ретінде «Алтын қолғап» жүлдесін иеленді. «Атлетик» өкілі саналатын Симон әлем чемпионатындағы 8 матчта бір ғана гол өткізіп, 7 ойында қақпасын «құрғақ» сақтады - бұл көрсеткіш бойынша ол көш бастап тұр.

Ал ФИФА Испания құрамасының қорғаушысы Пау Кубарсиді 2026 жылғы әлем чемпионатының үздік жас ойыншысы деп таныды. «Барселона» сапындағы 19 жастағы қорғаушы турнирдегі 8 матчтың бәрінде негізгі құрамда алаңға шықты. Жалпы Испания турнирде бір ғана гол жіберді - 1/4 финалда Бельгияға өткен доп (2:1).

Пікірлер (0)

Пікірлер (0)