Агенттің сөзінше, Рамазан Оразовтың оңалту кезеңі жоспарға сай өтіп жатыр. Жартылай қорғаушы алаңға мүмкіндігінше тезірек оралғысы келеді. Дегенмен нақты мерзім оның қалпына келу барысына байланысты анықталады.

«Оңалту сәтті өтіп жатыр. Рамазан алаңға мүмкіндігінше тезірек оралуға тырысуда. Ол кәсібилік пен еңбекқорлықтың нағыз үлгісі. Нақты қалпына келу мерзімі жағдайдың қалай өрбитініне байланысты болады, бірақ ол қолынан келгеннің бәрін жасап жатыр», — деді Ван Дейк.

Ойыншының өкілі қазақстандық футболшыны алдағы турнирде ұлттық құрама сапынан көруге үмітті. «Қазақстан құрамасымен бірге Ұлттар лигасында жақсы нәтижеге жетеді деп үміттенемін. Топта жеңіске жету керек», — деді агент.

Футболшы шілде айында Конференциялар лигасының бірінші іріктеу кезеңіндегі «Алашкертке» қарсы матчта (1:1) иығынан жарақат алған. Кейін ол Мәскеуде ота жасатқан.

Бұған дейін Оразовтың толық қалпына келуіне алты айға дейін уақыт қажет болуы мүмкін екені хабарланған еді. Алайда оңалу кезеңі сәтті өтсе, жартылай қорғаушы Ұлттар лигасының қыркүйектегі ойындарына дейін сапқа қайта қосылуы ықтимал.

Оразов биылғы ҚПЛ маусымында 15 матч өткізіп, үш гол соқты және үш нәтижелі пас берді. Қазақстан құрамасы турнирде Фарер аралдары, Словакия және Молдова құрамаларымен бір топта өнер көрсетеді.

Пікірлер (0)

Пікірлер (0)