Сары-қаралардың бас бапкері Рафаэль Уразбахтин Софияда шәкірттерінің 0:1 есебімен ұтылуына қатысты пікір білдірді. Маман матчтың басты сәттерін талдап, жіберіп алған голдың себептерін айтып берді.

Ойынның бірінші жартысында жоспар толығымен өзін ақтағанын атап өтті: қарсылас допқа иелік еткенімен, қорғанысты бұза алмады әрі жылдам шабуылшылары бос кеңістіктен айырылды. Дегенмен екінші таймда үздіксіз қорғаныстан жиналған шаршаңқылық өз әсерін тигізді.

«Бәрін тігіске қойып, тәуекел етуді жоспарламадық. Жанкүйерлерінің қолдауына сүйенген алаң иелері ойын тізгінін өз қолына алатынын жақсы түсіндік. Доппен жұмыс істегенде батылдық жетіспеді. Ойыншылар қайта сап түзеуді жақсы атқарғанымен, допты тым жылдам жоғалтып алып жатты. Қарсыластың қарқынын бәсеңдету үшін допты сәл де болса бақылауда ұстау керек еді», — деп келтіреді бапкердің сөзін ASnews.kz порталы.

Уразбахтин қарымта кездесуде команда келесі кезеңге өту үшін қолдан келгеннің бәрін жасайтынын баса айтты.

Қарымта ойын 11 тамызда Түркістанда өтеді. Осы жұптың жеңімпазы Чемпиондар лигасының плей-офф кезеңінде грекиялық АЕК-пен кездеседі. Ұтылған ұжым Еуропа лигасының плей-офф кезеңіне түсіп, ПАОК (Грекия) — «Андерлехт» (Бельгия) текетіресінің жеңімпазымен шеберлік байқасады.

Пікірлер (0)

Пікірлер (0)