Мадридтің «Реал» клубының бұрынғы бас бапкері Альваро Арбелоа Лондонның «Фулхэм» командасына келуі ықтимал. Бұл туралы италияндық журналисі Маттео Моретто хабарлады.

Дереккөздің жазуынша, «Фулхэм» мен 43 жастағы испаниялық маман арасындағы келіссөздер оң бағытта жүріп, аяқталуға жақындаған. Арбелоаның өкілдері Оскар Рибот пен Луис Алонсо клуб басшылығымен бірнеше рет байланысқа шыққаннан кейін, тараптар ынтымақтастық шарттарын талқылауда едәуір алға жылжыған.

Соған қарамастан, кейбір тұстар әлі нақтылауды қажет етеді. Дегенмен жалпы ахуал жақсы, ал клуб келісім алдағы күндері-ақ рәсімделуі мүмкін деп үміттеніп отыр.

Еске салайық, 2026 жылдың 9 маусымында «Реал» Альваро Арбелоаның бас бапкер қызметінен кеткенін ресми түрде жариялаған. Испаниялық маман мадридтік клубты 2026 жылдың қаңтарында қабылдағанымен, оның бұл қызметтегі кезеңі ұзаққа созылмады.

Арбелоаның «Фулхэмге» келуі бапкерлер ауысуының қызық тізбегімен де ерекшеленіп отыр. Лондондық клубты жуырда португалиялық Марку Силва басқарған еді. Ол Англиядан кетіп, Лиссабонның «Бенфикасына» ауысты да, онда Жозе Моуриньюдің орнын басты.

Ал Моуринью болса, Арбелоамен қоштасқаннан кейін мадридтік «Реалға» келді. Енді Арбелоа «Фулхэмде» босаған орынға отырып, Англия, Испания және Португалия арасындағы бапкерлердің өзінше бір «айналымын» тұйықтауы мүмкін.

2025/2026 маусымының қорытындысында Лондонның ең көне клубы АПЛ турнир кестесінде 11-орынға тұрақтады. «Дачниктер» 38 матчта 52 ұпай жинап, еурокубок жолдамалары үшін таласқа қосыла алмады.

Егер Арбелоа тағайындалса, ол «Реал» жүйесінен тыс жерде алғаш рет дербес бапкер ретінде жұмыс істеп көрмек және әлемдегі ең мықты чемпионаттардың бірінде өзін көрсетуге мүмкіндік алады.

Пікірлер (0)

Пікірлер (0)