Қазақстан құрамасын баптайтын Талғат Байсуфинов 2026 жылғы әлем чемпионатында өнер көрсетіп жатқан Өзбекстан ұлттық құрамасына қолдау білдірді. Бапкер өзбек жанкүйерлерінің бауырлас халықтардың туларын біріктіріп ұйымдастырған акциясы Қазақстан тарапын да толқытқанын айтып, мұны «өте дұрыс бастама» деп бағалады.

Байсуфинов өз сөзінде Қазақстанның Өзбекстан құрамасына шын жүректен жанкүйер екенін жеткізіп, алдағы ойындарда жақсы нәтиже тіледі. Оның айтуынша, ең кемі өзбек футболшылары жеңілмей, ең көбі жеңіске жетуі мүмкін.

«Ассаламу алейкум, қалайсыздар? Бәрі жақсы деп үміттенемін?!

Өзбек жанкүйерлері бауырлас халықтардың туларын біріктіріп ұйымдастырған акция бізді де қатты толқытты. Бұл өте дұрыс бастама, дұрыс қадам! Біз сіздердің ұлттық құрамаларыңызға шын жүректен жанкүйерміз және тек жақсы нәтижелер тілейміз. Өз басым, ең кемі жеңілмейсіздер, ал ең көбі жеңіске жетесіздер деп ойлаймын. Ішкі түйсігім мен сезімім соны меңзейді. Біз ғажайып жасай аламыз. Жақсы ойын көрсетеді деп үміттенеміз. Сіздерге сәттілік, футболдағы табыс аса қажет. Жігіттер жерге қаратпайды. Бағыңыз жансын, алға!» - деді Талғат Байсуфинов.

Өзбекстан құрамасы әлем чемпионатының финалдық кезеңіне шыққан Орталық Азиядағы алғашқы команда атанды. Бүгін бас бапкер Фабио Каннаваро шәкірттері мундиальдағы алғашқы ойынын Колумбияға қарсы өткізді. Мексиканың Мехико қаласындағы «Ацтека» стадионында өткен матчта өзбекстандықтар Колумбиядан жеңілгенімен, қанаттағы ойыншы Аббосбек Файзуллаев Өзбекстанның әлем чемпионаттары тарихындағы алғашқы голын соқты.

Пікірлер (0)

Пікірлер (0)