Швейцарияның Ньон қаласында өткен жеребеден кейін бас бапкер Рафаэль Уразбахтин жетекшілік ететін «Қайрат» Чемпиондар лигасының бірінші іріктеу кезеңінде Черногорияның бес дүркін чемпионы - «Сутьескаға» қарсы ойнайтыны белгілі болды.

«Сутьесканың» қазақстандық клубтармен еурокубоктардағы тарихында екі ғана ресми матч бар. Черногориялық ұжым екі кездесуді де 2018/19 маусымындағы Чемпиондар лигасының бірінші іріктеу раундында елордалық «Астанамен» өткізген. Ол жұпта екі ойын да қазақстандық клубтың пайдасына шешіліп, жалпы есеп 3:0 болды. Астанадағы алғашқы матчта «Астана» 1:0 есебімен жеңді, жалғыз голды пенальтиден Роман Муртазаев соқты. Никшичтегі қарымта ойында да елордалық команда 2:0 есебімен басым түсіп, бұл жолы Джордже Деспотович пен Серікжан Мужиков мергендік танытты.

«Сутьеска» 2025/2026 маусымында Черногория чемпионы атанды: команда 36 матчта 72 ұпай жинап, ең жақын қуғыншысы «Морнардан» үш ұпайға озып кетті. Сондай-ақ клуб лигада ең нәтижелі командалардың бірі болып, маусымда 61 гол соқты.

2026/27 маусымындағы Чемпиондар лигасының бірінші іріктеу раундындағы «Қайрат» - «Сутьеска» матчтары 2026 жылдың шілдесіне жоспарланған. Алғашқы ойын 7 немесе 8 шілдеде Алматыдағы Орталық стадионда өтеді, ал қарымта кездесу 14 немесе 15 шілдеде Черногорияда, Никшич қаласының Қалалық стадионында ойналады.

Пікірлер (0)

Пікірлер (0)