Жұптың жеңімпазы Еуропа лигасының негізгі кезеңіне жолдама алады. Ал жеңілген команда Конференция лигасында ойнайды. Бельгиялық БАҚ-тың есебінше, «Андерлехт» үшін Еуропа лигасына шығу шамамен 10 миллион еуро табыс әкелуі мүмкін.

Брюссельдік клуб биылғы еурокубоктық іріктеуде жеңілген жоқ. Команда «Хаммарбю» мен ПАОК-тан басым түсті. Осыған байланысты бельгиялық журналистер «Андерлехтті» жұптың фавориті санайды.

Сонымен қатар «Қайраттың» да өз артықшылықтары бар. Алматылық клуб Қазақстан чемпионатында қатарынан жеті жеңіске жетіп, жақсы ойын ырғағына ие болды.

Бельгиялықтар Темірлан Анарбековке ерекше назар аударып отыр. Қақпашы «Селтикке» қарсы ойындарда үш пенальтиді қайтарып, командасының Чемпиондар лигасының іріктеу кезеңінде алға жылжуына көмектесті.

«Андерлехт» үшін Алматыға сапар да оңай болған жоқ. Команда 5 мың шақырымнан астам жол жүріп, Қазақстанға алдын ала келді. Сонымен қатар бельгиялық БАҚ Орталық стадион алаңының жағдайы қонақтардың комбинациялық ойынына әсер етуі мүмкін деп санайды.

Дегенмен Витор Бруну алаң жағдайын сылтау етуден бас тартты. Бельгиялықтар «Андерлехттен» допқа бақылау жасап, Алматыдан кем дегенде тең нәтижемен қайтуды күтеді.

Пікірлер (0)

Пікірлер (0)