Іріктеудің басты матчтарының бірі ЛАСК пен «Селтик» арасындағы текетірес болды. Шотландиялық клуб алғашқы кездесуде 3:0 есебімен жеңіп, қарымта ойында да есеп ашты. Осылайша, екі матч қорытындысы бойынша «Селтик» 4:0 есебімен алға шықты. Алайда австриялықтар керемет камбэк жасады. ЛАСК төрт гол соғып, жалпы есепті теңестірді, ал қосымша уақытта бесінші добын енгізді — қарымта матчта 5:1, екі ойын қорытындысы бойынша 5:4. ЛАСК клуб тарихында алғаш рет Чемпиондар лигасының негізгі кезеңіне жолдама алды.

«Сабахтың» жолы да ерекше болды. Әзербайжандық клуб алғашқы матчта «Хапоэль» Беэр-Шеваға 1:2 есебімен жеңілді, ал қарымта кездесуде екі рет қиын жағдайға түсті. «Сабах» негізгі уақыттың соңғы секундтарында жалпы есепті теңестіріп, қосымша уақытта тағы екі гол соқты — 5:2, екі матч қорытындысы бойынша 6:4. Команда іріктеудің барлық төрт кезеңінен өтіп, өз тарихында алғаш рет ЧЛ-дың негізгі кезеңіне шықты. «Сабах» «Қарабахтан» кейін мұндай жетістікке жеткен Әзербайжанның екінші клубы атанды.

Плей-оффтағы ең мәртебелі жұптардың бірі — «Лион» мен «Фенербахче» арасындағы кездесу болды. Стамбұлдағы 1:1 есебінен кейін түркиялық клуб Франциядағы қарымта матчта 2:1 есебімен жеңіске жетті. Ведат Мурики мен Арчи Браун үзіліске дейін екі гол соқты, ал алаң иелері екінші таймда Малик Фофананың бір голымен ғана жауап қайтарды. Екі матч қорытындысы — 3:2. «Фенербахче» Чемпиондар лигасының іріктеуінен 2008/09 маусымынан бері алғаш рет өтті.

Тағы бір сенсация Норвегияда тіркелді. Загребтің «Динамосы» өз алаңындағы 2:2 есебінен кейін «Викингке» қарсы қарымта матчта есеп ашты. Бірақ алаң иелері үш голмен жауап беріп, 3:1 есебімен жеңіске жетті. Екі матч қорытындысы — 5:3. «Викинг» тарихында алғаш рет Чемпиондар лигасының негізгі кезеңіне шықты.

АЕК Софияда «Левскимен» 0:0 есебімен тең ойнағаннан кейін, өз алаңында болгариялық клубты 4:0 есебімен айқын жеңді. Афиналық команда ЧЛ-дың негізгі кезеңіне 2018/19 маусымынан бері алғаш рет оралды. Ал Братиславаның «Слованы» «Целеден» тек қосымша уақытта басым түсті: алғашқы матчтағы 1:1 нәтижесінен кейін словак клубы қарымта кездесуде 2:1 есебімен жеңді. Шешуші голды 100-минутта Кристиан Мартинес соқты.

Ал «Будё/Глимт» өз міндетін ең сенімді орындаған командалардың бірі болды. Норвегиялық клуб НЕК-ті сырт алаңда 3:1 есебімен жеңіп, кейін өз алаңында да 3:0 есебімен басым түсті. Екі матч қорытындысы — 6:1. «Будё/Глимт» Чемпиондар лигасының негізгі кезеңінде қатарынан екінші маусым ойнайды.

Турнирдің негізгі кезеңінің жеребесі 27 тамызда Монакода өтеді.

Пікірлер (0)

Пікірлер (0)