«Барселона» шабуылдың қапталын күшейту жоспарына 20 жастағы марокколық вингер Жессим Яссинді қосты. Ойыншыны командаға алуға түрткі болғандардың бірі - бас бапкер Ханси Флик.

Fichajes.net дерегінше, неміс маманы скауттарға Яссинді жеке бақылауда ұстауды тапсырған. Флик марокколық футболшы өз жобасына сай келеді деп санайды. Бапкер оның жылдамдығын, жекпе-жектегі батылдығын және бірнеше позицияда ойнай алуын ерекше бағалайды. Солақай вингер көбіне оң қапталдан ішке қарай ойыса шабуылдағанды ұнатады, қажет болса сол жақта да ойнай алады. Каталониялық клуб Яссинді бәсекесі жоғары ортада өсіп, ұзақ мерзімде пайда әкелетін инвестиция ретінде қарастырып отыр.

Дегенмен трансфер әзірге бастапқы сатыда ғана, ал келіссөздер қиын болуы мүмкін. Францияның «Страсбур» клубы Яссинді «Дюнкерк» командасынан 2026 жылдың қаңтарында 7 миллион еуроға сатып алып, онымен 2030 жылдың маусымына дейін келісімшарт жасаған. Француз клубы ұстанымын қатты ұстап отыр және болашағынан үміт күттіретін ойыншысын арзанға жібергісі келмейді.

«Барселона» да қаржылық шектеулерге байланысты қымбат тікелей сатып алуға бірден бара алмайды. «Көк-алақызылдардың» басшылығы балама нұсқаларды қарастырып, бастапқы шығынды кейінгі қайта сатудан түсетін пайда арқылы азайтуды көздейді. Қазірге дейін «Страсбурға» ресми ұсыныс жасалған жоқ.

Өткен маусымда Жессим Яссин барлық турнирде 34 матч өткізіп, үш гол соғып, он нәтижелі пас берді.

Пікірлер (0)

Пікірлер (0)