«Спартактың» бұрынғы капитаны әрі жартылай қорғаушысы Денис Глушаков алдағы 2026 жылғы Әлем чемпионатында айқын фаворит жоқ деп санайды. Оның пікірінше, чемпиондыққа негізгі үміткерлер қатарында Испания, Аргентина және Португалия құрамалары бар.

Глушаков Португалия құрамасындағы Криштиану Роналдудың рөлі шешуші мәнге ие болуы мүмкін екенін де атап өтті. Сондай-ақ ол Ламин Ямальдан жарқын ойын күтетінін жеткізді. Бұрынғы футболшының айтуынша, жас ойыншы жарақатына байланысты ұзақ уақыт алаңға шықпағандықтан, қазір өзін дәлелдеуге ерекше ынталы.

«Айқын фаворит жоқ. Испания, Аргентина және Португалия — өте мықты құрамалар. Криштиану Роналдудың Португалия құрамасында өзін қалай көрсететіні маңызды. Менің ойымша, Ямаль бұл турнирде жарқырайды. Ол жарақатына байланысты ұзақ уақыт ойнаған жоқ, ал қазір алаңға шығуға деген ынтасы зор. Турнирге ең жоғары бабында келеді деп ойлаймын және "Алтын доп" үшін таласа алады. Испания — жас команда, бұл оның басты артықшылығы», — деді Глушаков «Матч ТВ» телеарнасына берген сұхбатында.

2026 жылғы Әлем чемпионаты 11 маусым мен 19 шілде аралығында АҚШ, Мексика және Канадада өтеді. Қазіргі әлем чемпионы — Аргентина құрамасы. Олар 2022 жылғы әлем чемпионатының финалында Францияны жеңіп, чемпион атанған болатын.

Пікірлер (0)

Пікірлер (0)