«Жалпы алғанда, базалар мен академиялар көп жағынан ұқсас. «Челсидің» басты айырмашылығы — оның ауқымы мен көгалдарының саны, ол жақта олар өте көп. Мені футбол алаңдарының көптігі, сондай-ақ жергілікті ойыншылардың жоғары кәсібилігі таңғалдырды. Бұл жаттығу процесіне, матчтарға және тіпті тамақтану рационына да қатысты. Тәртіп мәселесінде олар өте жоғары деңгейде», — деп атап өтті шабуылшы.

Қазақстандық футболшы лондондықтардың қатарына алғаш рет 2024 жылдың қарашасында, екі апталық қаралымда болған кезде қосылған еді. Ал 2025 жылдың ақпанында «көктер» ойыншының трансферін ресми түрде рәсімдеп, онымен еңбек шартына қол қойды. Ағымдағы жылдың 29 маусымында Сәтбаев Англияға аттанып, Кобхэмдегі әйгілі базада жаттығуын бастап кетті.

«Челсидің» жаттығу орталығы (Cobham Training Centre) 140 акр (шамамен 56,6 гектар) аумақты алып жатыр. Кешеннің ресми ашылуы 2007 жылдың жазында өткенімен, команданың негізгі құрамы ол жаққа 2005 жылы-ақ көшіп барған болатын. Жастар командалары мен қоғамдық павильонға арналған бөлек корпус 2008 жылы пайдалануға берілді. Кобхэмнің инфрақұрылымы 30 ашық алаңды (оның алтауы АПЛ регламентіне толық сай келеді, ал үшеуі жер асты жылыту жүйесімен жабдықталған), сондай-ақ кез келген ауа райында жаттығу жасауға арналған жасанды төсеніші бар толық өлшемді жабық манежді қамтиды.

Пікірлер (0)

Пікірлер (0)