Португалия құрамасының және «Манчестер Юнайтедтің» бұрынғы ойыншысы инстаграмдағы парақшасына АҚШ-та түсірілген фотоларын жүктеді. Кадрлардан Майамиде өткен әлем чемпионатындағы Португалия - Колумбия матчының бір сәті байқалады.

Сондай-ақ Нани ФИФА президенті Джанни Инфантиномен, «Манчестер Юнайтедтегі» бұрынғы әріптесі - француз қорғаушысы Микаэль Сильвестрмен және әйгілі португалиялық футболшы әрі бапкер Паулу Бентумен кездескенін көрсетті.

«Футболдан әлем чемпионатының атмосферасы мүлде бөлек сезіледі. Әсіресе дәл осы Флоридада Португалияны қолдауға мүмкіндік туған кезде, оны жіберіп ала алмадым. Жол жалғасуда. Алға, Португалия!» - деп жазды ол.

Еске салайық, «Манчестер Юнайтед» пен Португалия құрамасындағы ойынымен танылған 39 жастағы Нани қазір Қазақстан Премьер-Лигасында «Ақтөбенің» намысын қорғап жүр. Ол сары қағаздардың лимитінен асып кетуіне байланысты 15-турда «Жетісуға» қарсы матчты өткізіп алды. Легионерінсіз қалған «Ақтөбе» сырт алаңда 0:1 есебімен жеңіліп қалды.

Пікірлер (0)

Пікірлер (0)