Мексика футболының ең танымал қақпашыларының бірі Гильермо Очоа кәсіби мансабын аяқтайтынын мәлімдеді.

41 жастағы голкипер 2026 жылғы әлем чемпионатына қатысып үлгерді. Ол топтық кезеңде Чехияға қарсы ойында (3:0) 78-минутта алаңға шығып, мансабындағы төртінші мундиальда өнер көрсетті.

Очоа әлеуметтік желідегі парақшасында жанкүйерлеріне алғыс айтып, қоштасу жазбасын жариялады: «Арманым мені қаншалықты алысқа алып баратынын тіпті елестете де алмаппын. Бүгін өткен жолыма мақтанышпен қарап, тек мынаны айта аламын: отбасым - рақмет. Командадағы әріптестерім - рақмет. Жолдың әр кезеңінде жанымнан табылған әрбір жанкүйерге - рақмет. Мен өзіммен бірге миллиондардың махаббатын және Мексика үшін барымды салғаныма деген сенімді алып кетемін. Біз бастан өткерген дүниені ешкім бізден тартып ала алмайды. Шын жүректен бәріңізге алғыс айтамын!»

Осылайша, Очоа 22 жылға созылған кәсіби жолына нүкте қойды.

Қақпашы Мексика құрамасының алты әлем чемпионатына қатысқан. Бұл көрсеткіш бойынша ол Португалия шабуылшысы Криштиану Роналдумен және Аргентина капитаны Лионель Мессимен теңесті. Ал 2014, 2018 және 2022 жылдардағы әлем чемпионаттарында ұлттық құраманың негізгі қақпашысы болды.

Клубтық мансабында Очоа «Аяччо», «Малага», «Гранада», «Стандард», «Салернитана», АЕЛ және басқа да командалардың намысын қорғады. Ол «Америкамен» Клаусура-2005 турнирінде чемпион атанса, Льеждің «Стандарды» сапында Бельгия кубогын жеңіп алды.

Халықаралық деңгейде Очоа Мексикаға КОНКАКАФ-тың Алтын кубогын алты рет ұтып алуға көмектесті, сондай-ақ 2020 жылғы Токио Олимпиадасында қола жүлдеге қол жеткізді.

Очоа ұлттық құрамада 2005 жылы дебют жасады. Мексика сапында 154 матч өткізіп, 154 гол жіберді және 64 ойында қақпасын «құрғақ» сақтап қалды.

Пікірлер (0)

Пікірлер (0)