«Манчестер Юнайтед» қазіргі үйі «Олд Траффордқа» таяу жерде 100 мың көрерменге арналған жаңа стадион салу бағытында маңызды қадам жасады. Клуб құрылысқа қажет жердің негізгі бөлігін сатып алу жөнінде келісімге келді.

2025 жылдың наурызында Лондонда миноритарлық иесі сэр Джим Рэтклифф ауқымды тұжырымдамасын таныстырғаннан кейін көпшілік бірден көзге түсетін ілгерілеу байқамаған. Бірақ дереккөздердің айтуынша, жер телімін алу бойынша келіссөздер осы уақыт ішінде жабық түрде жүріп жатқан.

Дереккөздер «Юнайтедтің» қазір Уорфсайд Уэй, Еуропа Уэй және Джон Гилберт Уэй арасындағы, «Стретфорд Эндтің» арт жағындағы автотұрақтарға жақын орналасқан, жолдар түйісетін үшбұрыш аумақты иеленгенін хабарлады. Бұл - жаңа стадион салуға жеткілікті 25 акр жер.

Сонымен бірге аренаның нақты жоспары мен сметасы әлі бекітілмеген. Бұған қоса, әсер ететін аумақтағы кейбір қолданыстағы жалға алушылармен қосымша келіссөздер жүргізу қажет болады.

Бұл жаңалық «Олд Траффордты» жаңғырту жөніндегі мэрлік даму корпорациясын (МДК) құрудағы негізгі тұлғалардың бірі Энди Бёрнэм парламент мүшесі ретінде ант берген күні жарияланды. Осыған байланысты ол Үлкен Манчестер мэрі қызметінен кетеді.

Бірнеше дереккөз Би-би-си Спортқа Бёрнэмнің орнына мэр болып қай партия өкілі келсе де, көп миллиард фунттық бас жоспарға өзгеріс енгізе алатын жалғыз тарап - үкімет екенін айтқан.

Клубтың жаңа стадион жобасы бойынша бас атқарушы директоры Коллетт Рош бұл қадамды жобаның келесі кезеңіне өтудегі маңызды меже ретінде бағалады. «Бүгінгі жаңалық “Манчестер Юнайтед” үшін әлемдік деңгейдегі жаңа үйге қарай жасап жатқан қадамымызды айқын көрсетеді және жобаның келесі кезеңіне өту жолындағы маңызды межені білдіреді», - деді ол.

Рош жаңа аренаны «Олд Траффордқа» барынша жақын салу жанкүйерлер үшін қымбат мұра мен дәстүрді сақтауға мүмкіндік беретінін атап өтті. «“Олд Траффордқа” соншалық жақын жерде салу бізге жанкүйерлеріміз үшін аса қымбат мұра, дәстүр мен қалыптасқан рәсімдерді сақтауға мүмкіндік береді. Біз стадионды жанкүйерлер үшін ғана емес, жанкүйерлермен бірге салуға ниеттіміз: ойымыздың өзегінде атмосфера, қолжетімді баға және ыңғайлылық тұрады.

«Бұл - жергілікті де, ұлттық та өсім мақсаттарымен толық үндесетін, бір ұрпаққа бір келетін мүмкіндік. Жаңа үйіміз үшін дұрыс жерді қамтамасыз ету - шешуші маңызға ие болды», - деді ол.

Рэтклиффтің кейбіреулер «цирк шатыры» деп атап кеткен жобасы жүзеге аса ма деген күмән айтқандар болғанымен, клуб өкілдері өз ұстанымынан таймаған. Дегенмен «Юнайтед» жердің қаншаға түскенін де, қаржының қайдан алынғанын да жарияламады.

Клуб 12 маусымда 2027 жылдың маусымында өтеуі тиіс 425 млн доллар (320,95 млн фунт) көлеміндегі облигацияларды жабу үшін 550 млн доллар (415,35 млн фунт) қаржыландыру тартқанын растаған. Бірақ осы мәміледегі қосымша капиталдың қандай да бір бөлігі жерді сатып алуға жұмсалды ма - әзірге белгісіз.

«Юнайтед» жер телімін өндірістік кеңістік ұсынатын жетекші компаниялардың бірі әрі «Блэкстоун» портфеліне кіретін «Индуранттан» сатып алғанын растады. Алайда бұл 2023 жылы «Блэкстоун» 275-280 млн фунтқа алғаны айтылған Траффорд Парк ауданындағы дәл сол жер ме, жоқ па - нақтыламады.

Клуб таңдаған аумақ қаланың «Метролинк» жүйесінде жаңа аялдамалар ашуға және кеңірек теміржол желісіне қосылуға көбірек мүмкіндік береді деп есептейді. Бұл жанкүйерлерді Англиядағы ең үлкен стадионға айналуы ықтимал аренаға жеткізуді жеңілдетуі тиіс.

Жобаның МДК аясындағы жалпы жоспарға қалай кіріктірілетіні 9 шілдеде белгілі болмақ. Сол күні «Олд Траффордта» ауданның бас жоспарының бастапқы нұсқасы таныстырылады.

Пікірлер (0)

Пікірлер (0)