Мундиалды бірлесіп өткізуші елдердің бірі Ванкувердегі кездесудің алғашқы минуттарынан-ақ басымдықты өз қолына алды. 16-минутта Кайл Ларин қарсылас айып алаңында суыққандылық танытып, есеп ашты. Арада тағы 13 минут өткенде, Хонатан Дэвид қайтқан допқа бірінші жетіп, екінші голды соқты.

33-минутта төреші катарлықтардың фолынан кейін «нүктені» нұсқағанымен, VAR жүйесінің көмегінен кейін пенальтиді тоқтатты. Дегенмен канадалықтар бұған мойымады, бірінші таймға қосылған уақытта сол баяғы Дэвид дубль авторы атанды.

Кездесудің екінші бөлігі Катар үшін нағыз қорқынышты түске айналды. 53-минутта Ассим Мадибо тікелей қызыл қағаз алды — төреші эпизодты бейнеқайталаудан қайта қарап, алғашқы сары қағаз туралы шешімін алаңнан қуу жазасына ауыстырды.

Сан басымдығына ие болған Канада нағыз шабуыл шебін құрды. 64-минутта Натан Салиба айып алаңының сыртынан бағыттаған жойқын соққысымен допты бағанаға тигізе отырып торға тулатты. 75-минутта қонақтардың қорғаушысы Аль-Маннаи кезекті пасты бөгемек болып, допты өз қақпасына соғып алды (автогол). Канадалықтардың бұл бенефисіне 92-минутта лайықты хет-трик жасаған Хонатан Дэвид соңғы нүктені қойды.

В квартетіндегі жағдай барынша шиеленісе түсті. Осы турда бұған дейін Швейцария Босния және Герцеговинадан сенімді түрде басым түскен болатын (4:1). Топтағы шешуші матчтар 25 маусымда өтеді: Канада Швейцариямен бетпе-бет келсе, Катар босниялықтарға қарсы ойында алғашқы ұпайларына қол жеткізуге тырысады.

Плей-офф кезеңіне әр квартеттен ең үздік екі құрама тікелей жолдама алады. Сондай-ақ өз топтарында үшінші орын алған ең үздік сегіз команда 1/16 финалға шығу мүмкіндігіне ие болады.

Пікірлер (0)

Пікірлер (0)