Аргентина құрамасының 27 жастағы жартылай қорғаушысы Леверкузеннің «Байерімен» қоштасып, «тракторшылармен» төрт жылдық келісімге қол қойды. Қос тарап трансфердің қаржылық шарттарын құпия сақтауды жөн көрді.

Паласиостың еншісінде 2022 жылғы мундиал жеңісі, 2026 жылғы турнирдің күміс жүлдесі және Америка кубогындағы екі триумф бар. Соңғы әлем чемпионатында ол топтық кезеңдегі Иорданияға қарсы кездесуде (3:1) алаңға шықты.

«Бұл — үлкен мақсаттары бар команда. Англияда өнер көрсетіп, әлемнің үздік клубтарымен және ойыншыларымен бәсекелесу мүмкіндігіне ие болғаныма өте қуаныштымын», — деді аргентиналық ойыншы ауысымы туралы.

«Ипсвичтің» бас бапкері Гари О'Нил бұл келісімнің маңыздылығын атап өтті: «Біздің қатарымызға халықаралық аренада да, клубтық деңгейде де ірі жеңістердің дәмін татқан футболшы қосылды. Оның мол тәжірибесі осы жазда құрамды күшейту жолында шешуші факторға айналады».

Жартылай қорғаушы кәсіби мансабын 2015 жылы «Ривер Плейтте» бастап, 2018 жылғы Либертадорес кубогын және екі рет Аргентина кубогын жеңіп алған. 2020 жылы ойыншы Германияға ауысты. «Фармацевтер» үшін алтынға айналған 2023/24 маусымында Хаби Алонсоның басшылығымен аргентиналық футболшы 24 матчқа қатысып, чемпиондық атаққа қол жеткізді, кейінірек оған Германия кубогы мен Суперкубогын қосты. Ол Бундеслигада өткізген алты жыл ішінде жалпы 186 матчта алаңға шығып, 15 гол соқты.

Паласиос «Ипсвичтің» осы трансферлік терезедегі он бірінші жаңа ойыншысы болды, ал элитаға оралған клубтың жалпы шығыны 150 миллион фунт стерлингтен асты. Басшылық, сондай-ақ, «Астон Вилладан» шабуылшы Тэмми Абрахамды жалға алу келісімін аяқтауға үмітті. Маусым «тракторшылар» үшін сәтті басталды: олар чемпионатта «Сандерлендті» жеңіп (2:1), Лига кубогынан «Лестер Ситиді» шығарып жіберді.

Пікірлер (0)

Пікірлер (0)