Тирандағы кездесуде «Астана» ең төменгі есеппен басым түсті. Ойын тағдырын 69-минутта Рамазан Кәрімов соққан гол шешті.

Panorama Sport жазуынша, «Динамо» Конференциялар лигасындағы жаңа маусымын өз алаңындағы жеңіліспен бастады. «Эльбасан Аренада» бірінші таймда алаң иелері белсендірек көрінгенімен, ең қауіпті мүмкіндіктерді «Астана» жасады, ал Текью бірнеше рет командасын құтқаруға мәжбүр болды.

Екінші таймда ойын қарқыны бәсеңдегенімен, бастама «көктегілердің» қолында қала берген. «Астана» қарымта шабуылға көбірек иек артқан, сондай сәттердің бірінде «Динамо» қорғаушылары қателік жіберіп, Кәрімов оны тиімді пайдаланып, жеңіс голын соққан.

Албаниялық клуб есепті теңестіруге тырысқанымен, нәтиже шықпаған. Матч соңында «Динамо» қақпасы маңында тағы бір қауіпті эпизод болып, бұл жолы алаң иелерін көлденең қақпа бағаны құтқарып қалған. Қорытындысында ойын «Астананың» 1:0 есебімен жеңісімен аяқталды. Жарияланымда «Динамоның» енді қарымта кездесуде осы айырманы жоюға талпынатыны айтылған.

«Астана» мен «Динамо Сити» арасындағы қарымта матч 2026 жылдың 16 шілдесінде «Астана Аренада» өтеді.

Пікірлер (0)

Пікірлер (0)