Мазбаевтың сөзінше, матчта екі жақта да мүмкіндіктер болды, ал «Ұлытау» екінші таймда бірінші таймнан жақсырақ ойнаған. Команда есепте ұтылып тұрып та мінез көрсеткенін атап өткен маман ойын соңында тіпті жеңіске жетуге де болатынын айтты. Дегенмен ол тең нәтижеге риза екенін жасырмады: соңғы екі ойында жеңіліп қалғаннан кейін бұл бір ұпайдың психологиялық тұрғыда маңызды болғанын жеткізді.

Бапкер қазақстандық футболдағы әділдік пен құрмет мәселесіне де тоқталды. Ол екі баспасөз мәслихатына қатыспағанын айтып, мұны «біздің футболда біз секілді командаларды құрметтемейді» деген ойымен байланыстырды. Мазбаев бірінші айналымда көп ұпай жинағандарының «ешкімге ұнамайтынын» және өздерін «біреулердің тамағына кептелген сүйектей» сезінетінін айтты.

«Өте ауыр ойын болды, деңгейі шамалас екі команда кездесті. Екі жақта да сәттер болды. Бірінші тайммен салыстырғанда, екінші таймда жақсырақ ойнадық. Есепте ұтылып жатсақ та, жігіттер мінез көрсете білді. Ойынның соңында тіпті жеңіске де жетуге болатын еді. Дегенмен бұл нәтижеге ризамыз. Бұл бір ұпай бізге оңай келген жоқ, өйткені соңғы екі матчта жеңіліп қалғанбыз. Психологиялық тұрғыда бұл бізді сындырып жібермесе де, аздап әсер етті.

Өздеріңіз білесіздер, мен екі баспасөз мәслихатына қатысқан жоқпын. Себебі біздің футболда біз секілді командаларды құрметтемейді. Бірінші айналымда көп ұпай жинағанымыз ешкімге ұнамайды. Біреулердің тамағына кептелген сүйектей болып қалғандай әсер бар. Сондықтан менің ойымша, мұндай жүйеде әділдік болмаса, футболымыз дамымайды.

Футболға бейжай қарамайтын барша адамды тек өз басын емес, болашақты да ойлауға шақырамын. Егер әділдікті өзіміз орнатпасақ, оны біз үшін ешкім жасап бермейді. Біз әділетті Қазақстан, Жаңа Қазақстан туралы айтып жүрміз, сондықтан өзіміз өзгермесек, көзқарасымыз бен ниетімізді түземесек, футбол дамымайды.

Ешкімге өкпем жоқ. Бапкер ретінде мені футболдағы ең соңғы адам деуге келмейді деп ойлаймын. Бірақ әділдік болмаса, футбол дамымайды. Біздің футбол әділ болуы керек.

Енді «Қайратқа» дайындаламыз. Бізде екі-үш футболшы жарақат алды. Олардың орнын толыққанды баса алатын ойыншылар жоқ. Бірақ жеңіске жету үшін бар күшіміз бен қуатымызды саламыз», - деді маман.

Матчтың өзіне келсек, үзіліске дейін Силла Кеба айып алаңының ортасына бағытталған пасты бірінші болып игеріп, «Каспийді» алға шығарды. Ақтаулықтар бастаманы өз қолында ұстауға тырысқанымен, екінші таймда Бақдәулет Зүлфиқаров есепті теңестірді. Мазбаев алдағы турда команда «Қайратқа» дайындалатынын, екі-үш ойыншының жарақат алғанын және олардың орнын толыққанды алмастыратын футболшылардың жоқ екенін де атап өтті. Соған қарамастан, «Ұлытау» жеңіс үшін бар күшін салатынын айтты.

Пікірлер (0)

Пікірлер (0)