Алғашқы кездесуде 1:0 есебімен жеңіске жеткен «Астана» қарымта ойынды өз алаңында өткізді. Сол матчтағы жалғыз голды Рамазан Кәрімов соққан еді. Бұл жолы елордалық команда 23-минутта Бауыржан Исламханның пенальтиден дәл соққан добынан кейін есепте алға шықты.

Алайда үзілістен кейін ойынның бағыты өзгерді. 49-минутта «Астананың» қорғаушысы Кипрас Казуколовас қақпашы Чондричтің қателігінен кейін екінші сары қағазын алып, алаңнан қуылды. Бір минут өтпей Бруно Дита пенальтиден есепті теңестірді, артынша Хекуран Бериша «Динамо Ситиді» алға шығарды. Негізгі уақыт 2:1 есебімен қонақтардың пайдасына аяқталып, екі матчтың қорытындысы бойынша қосымша уақытқа ұласты. Овертаймда албаниялық клуб тағы екі гол соғып, 4:1 есебімен жеңді. Осылайша жалпы есеп 4:2 болып, «Динамо Сити» екінші іріктеу кезеңіне өтті.

Ойыннан кейін Рамазан Кәрімов кездесудің шешуші тұсы ретінде алаңнан қуылуды атады.

«Бір ғана эпизод бүкіл ойынды өзгертті. Бізді қолдауға келген жанкүйерлерден кешірім сұрағым келеді», - деді ол.

Шабуылшыдан «Астана» азшылықта қалмаған жағдайда матч қалай аяқталуы мүмкін еді деген сұрақ та қойылды. Кәрімов бұл жөнінде нақты болжам айту қиын екенін жеткізді.

«Ешкім білмейді. Іске асыру жағы дәл мені сүріндірді. Жұмыс істеу керек», - деп мойындады Кәрімов.

Еске салайық, алғашқы ойында Кәрімовтің голы «Астанаға» 1:0 есебімен жеңіс әкелгенімен, бұл басымдық Конференция лигасының іріктеуіндегі келесі кезеңге өтуге жеткіліксіз болды.

Пікірлер (0)

Пікірлер (0)