Ойыншылық мансабында Шойтымов Қазақстан кубогын жеңіп алған. 1999 жылы ол Қызылорданың «Қайсар» клубы сапында аталған трофейді иеленді. Бұл командада 101 матч өткізіп, төрт гол соқты. Сондай-ақ «Ақтөбе» сапында 82 ойын өткізіп, төрт рет мергендік танытты.

Мансабын аяқтағаннан кейін Шойтымов жаттықтырушылық қызметке ауысып, «Ертістің» мәліметінше, бапкердің көмекшісінен бас бапкерге дейінгі жолдан өтті. Ол «Жетісай», «Байқоңыр», «Яссы» және «Қайсар» клубтарындағы жұмысымен танымал. Павлодарлық клубқа тағайындалғанға дейін Ақтаудың «Каспий» командасын басқарды.

«Павлодарлық футбол клубы «Ертіс» 46 жастағы қазақстандық маман, бұрынғы кәсіби футболшы Ерлан Дарханұлы Шойтымовпен келісімшартқа қол қойды. Ерлан Дарханұлына жаңа қызметінде сәттілік тілеп, «Ертіспен» бірге алдына қойылған міндеттерді орындауын тілейміз!» — делінген клубтың баспасөз қызметінің хабарламасында.

Қазақстан Премьер-лигасының 2026 жылғы маусымында 21 матчтан кейін «Ертіс» 17 ұпаймен соңғы, 16-орында тұр.

Павлодарлық клуб — Қазақстанның бес дүркін чемпионы. «Ертіс» 1993, 1997, 1999, 2002 және 2003 жылдары ел чемпионатында алтын медаль жеңіп алған.

Пікірлер (0)

Пікірлер (0)