Уэльс жасөспірімдер құрамасы қорғаушысының Лига кубогының екінші кезеңінде «Норвич Ситиге» қарсы ойында негізгі құрамда шығуы қорғаныс шебіндегі ойыншы тапшылығына байланысты бапкерлер штабының мәжбүрлі шешімі болды. «Қарлығаштар» 1:2 есебімен ұтылғанымен, Аньядике 2018 жылы «Фулхэм» сапында 15 жас 174 күнінде ойнаған жартылай қорғаушы Харви Эллиоттың жетістігінен асып түсті.

Жасөспірімнің дебюті өзі дүниеге келер тұста ғана ашылған клубтың өз алаңында өтті. Дегенмен матчты соңына дейін өткізу мүмкін болмады: екінші таймда бұлшықеттері тартылып қалғандықтан, ойыншы алмастырылды.

«Бұл Ноа үшін ғажайып кеш болды, ол бұл мүмкіндікке толықтай лайық еді. Мектеп каникулы кезінде оның бірінші командамен бірге жаттыққаны бізге өте тиімді болды, — деді «Кардиффтің» бас бапкері Брайан Барри-Мерфи. — Ол аса дарынды, қарқынды дамып келеді, сондықтан өз таңдауымызға еш күмәнданған жоқпыз».

Аньядике бір жыл ішінде дебют жасау жасы бойынша клуб рекордын жаңартқан үшінші футболшы болды: оған дейін бұл нәтижеге Роб Танкевич (16 жас 117 күн) пен Аксель Дончев (15 жас 234 күн) қол жеткізген. Дегенмен бүкіл Футбол лигасының абсолютті рекорды өзгеріссіз қалды — ол 2008 жылдан бері Рубен Ноубл-Лазарусқа (15 жас 45 күн) тиесілі.

Бас бапкер жас талантты ұқыпты дамытудың маңыздылығын атап өтті: «Ноаның дене бітімі мықты, бірақ ол әлі өте жас. Құлдырау да, өрлеу де болады. Біздің міндетіміз — оны артық қысымнан қорғау, үйретуді жалғастыру және негізгі құрамның тірегіне айналуына біртіндеп дайындау».

Аньядике Чемпионшиптегі алғашқы матчын алдағы сенбіде «Шеффилд Юнайтедке» қарсы өткізуі мүмкін. Сондай-ақ жарақатынан айығып келе жатқан 28 жастағы Габриэль Ошо да команданың қорғанысына оралады деп күтілуде.

Пікірлер (0)

Пікірлер (0)