Клуб басшысы жобада өзгеріс барын растады. Оның айтуынша, құрылыс кідіргендіктен, қазір үшінші тараппен келіссөздер жүріп жатыр және ескі жобаны ауыстыру жоспарланып отыр. «Стадионның сыйымдылығын 35 мыңнан 60 мың орынға дейін ұлғайтқымыз келеді», - деді ол.

Қызайбаев қаржыландыру мәселесіне де тоқталды. Оның айтуынша, қазіргі стадионға жергілікті әкімдіктен қаражат бөлінген, алайда жетпей тұрған соманы клуб өзі жабуды көздейді. «Инвестиция тартып, демеушілерді қосып, өз қаражатымызды да саламыз», - деді «Ордабасы» президенті.

Сондай-ақ ол Шымкентте академия салу жоспары өзгермейтінін айтты. Қызайбаев мұны клубтың қала мен тұрғындар алдындағы міндеті деп атады: «Клубты жекеменшікке өткізген кезде академия саламыз деп уәде бергенбіз. Сондықтан Шымкентте академия болады, міндетті түрде болады». Оның сөзінше, стадионның жанынан академия, жаттығу базасы, қонақүй мен мейманхана да салынып, бөлек футбол қалашығы бой көтеруі тиіс. «Құжат рәсімдеу жағынан біраз уақыт кетіп жатыр, бірақ бәрін саламыз», - деді ол.

Шымкенттегі жаңа футбол стадионының құрылысы 2024 жылдың маусым айының соңында қала әкімі іргетасын салтанатты түрде қалау рәсімін өткізгеннен кейін ресми түрде басталған. Бастапқыда 35 мың орындық аренаны 2026 жылы пайдалануға беру жоспарланған, алайда жер телімдерін рәсімдеу кешіккендіктен, жұмыстың белсенді кезеңі тек 2026 жылдың көктемінде ғана басталды. Енді сыйымдылықты арттыру үшін жоба қайта қаралып жатқандықтан, құрылыстың нақты жаңа аяқталу мерзімі мемлекеттік сараптамадан өткеннен кейін ғана түпкілікті бекітіледі.

Пікірлер (0)

Пікірлер (0)