Итальяндық маман «шпорларды» қайта құруға 400 миллион фунтқа жуық қаржы жұмсағанымен, АПЛ-дегі маусымның алғашқы матчы-ақ ең қомақты трансферлік бюджеттің өзі команданың жеңілістерін тоқтатпайтынын көрсетті. Де Дзербидің өзі мамыр айында маусымды құтқару үшін бөлінген жеті матчта бапкерден гөрі психолог ретінде жұмыс істегенін айтқан еді. Тапсырма орындалғанымен, «Тоттенхэм» элитада соңғы турда «Эвертонды» жеңу арқылы әзер қалды.

Жазда клуб сұмдық маусым қайталанбас үшін жаңа ойыншылар алуға орасан зор қаражат бөлді. Бірақ бастама сорақы болды: «Брентфорд» алғашқы салмақты қысымда-ақ «шпорлардың» быт-шытын шығарды. Мұның өзі тек трансферлермен психологиялық беріктік қалыптастыра алмайтыныңды ұқтырды.

Ойыннан кейін Де Дзерби әлем чемпионатынан кеш оралғандар мен жаңадан келгендердің физикалық бабын сылтау етті. Бірақ мұнымен қарапайым нәрселердегі сәтсіздікті де, төзімділіктің жоқтығын да ақтай алмайсың.

BBC арнасындағы Match of the Day бағдарламасының эфирінде Де Дзерби: «Нашар ойын. Біз жекпе-жектерде жеңіліп қалдық, бұл негізгі себеп болды. Физикалық тұрғыдан тиісті деңгейде болмадық, бірақ бұл матчты жақсылап талдауымыз керек», — деді.

Кездесу серпінді басталғанымен, «Тоттенхэм» жанкүйерлерінің бір бөлігі 49-минутта есеп 3:0 болғанда-ақ стадионнан кете бастады. Ойынды стадионнан Джон Бон Джови де тамашалады, ал команда шынымен де мұңлы балладаға арқау боларлық ойын көрсетті. Осыдан кейін Игор Тьяго пенальтиден мүлт кетіп, есепті одан әрі ұлғайту мүмкіндігін жіберіп алды.

Де Дзерби бірден төрт жаңа ойыншыны — Робертсон, Сенеси, ван Хекке және Тоналиді негізгі құрамға шығарды. 100 миллион фунтқа алынған Тоналиді «Брентфордтың» рекордтық жаңа ойыншысы Мамаду Сангаре толықтай көлеңкеде қалдырды. Ал 85 миллионға алынған Матеус Фернандес қосалқы құрамнан шықты. Де Дзербиді құрам мәселесінен бұрын командада мінез бен күрескерліктің жоқтығы көбірек мазалауы тиіс.

Алаң иелері сапынан есепті 12-минутта Кин Льюис-Поттер ашса, үзіліске дейін Виталий Янельт есепті еселеді. Де Дзерби алаң шетінде айқайлап, командасын сілкіп алуға тырысқанымен, футболшылар еңсесін түсіріп алды. Үзілістен кейін Галлахер мен Бергвалль алаңға қайта шықпады.

Де Дзербиге енді қайтадан психолог рөліне еніп, командаға ішкі беріктік дарытудың жолын іздеу керек. Мұны чек кітапшасымен шеше алмайсың.

Бұл АПЛ-дегі алғашқы тур ғана болса да, Брентфордтағы жағдай Постекоглу, Франк және Тудор кезеңінен бері созылып келе жатқан бұрынғы сценарийдің жалғасы сияқты көрінді.

Де Дзерби сөзін қорытындылай келе: «Мен нәтижеге де, ойынға да таңғалдым. Жаңа жобаны бастап жатырмыз, бірақ бүгін оның негізін көрсете алмадық. «Брентфордта» керемет рух болды — бұл біз үлгі алатын жайт», — деді.

Бұл жеңіліс мәселе тек жаңа ойыншыларда емес екенін көрсетті. Де Дзерби тек құрамды емес, осындай сәтсіздіктер қалыпты жағдайға айналған клуб мәдениетін өзгертуі тиіс.

Пікірлер (0)

Пікірлер (0)